Almatyda AShM О́simdikter karantıni jáne fıtosanıtarııalyq baqylaý beketteri jónindegi aımaqtyq ınspeksııasynyń bóliminiń eks-basshysy 7 jylǵa bas bostandyǵynan aıyryldy. Bul týraly Medeý aýdanynyń №2 soty habarlady, dep jazady Egemen.kz.
Oǵan bopsalaý arqyly birneshe ret para aldy degen aıyp taǵyldy.
Sot habarlamasyna sáıkes, aıyptalýshy fıtosanıtarııa sertıfıkattary men basqa da qajetti qujattardyń joqtyǵy úshin jaýapkershilikke tartylýy tıis adamdardan aqshalaı jáne zattaı para alǵan.
Eks-sheneýnik alǵan paranyń jalpy somasy 157 580 teńgeni qurady.
Aıyptalýshy kinásin moıyndamady, degenmen, sottyń málimetinshe, qylmys ár túrli dáleldemelermen rastalǵan. Prokýror ony 8 jylǵa bas bostandyǵynan aıyrýdy surady.
Sot departamenttiń eks-basshysyn para alǵany úshin kináli dep tapty.
«Belgili bir laýazymdardy atqarý men belgili bir qyzmetpen aınalysý quqyǵynan ómir boıyna aıyra otyryp, ortasha qaýipsizdigi bar túzeý mekemesinde 7 jylǵa bas bostandyǵynan aıyrý jazasy taǵaıyndaldy», delingen habarlamada.
Sot jeńildetetin mán-jaı retinde sottalýshynyń qylmystyq jaýapkershilikke alǵash ret tartylǵanyn eskerdi. Memlekettik qyzmetshi anty men kásibı antty buzýy aýyrlatatyn mán-jaı dep tanyldy.
Úkim zańdy kúshine engen joq.