Otbasy kúnine oraı «Rýhanı jańǵyrý» qazaqstandyq qoǵamdyq damý ınstıtýtynyń Otbasy ınstıtýtyn zertteý ortalyǵynyń uıymdastyrýymen «Bala asyrap alýshy ata-analar mektebi» onlaın kýrsynyń tanystyrylymyn ótkizdi, dep jazady Egemen.kz.
Atalǵan kýrs Otbasy ınstıtýtyn zertteý ortalyǵynyń bastamasymen jáne de «Otbasy akademııasy» qoǵamdyq qory men «Kovcheg» qaıyrymdylyq qorynyń birlese ázirlegen jobasy.
«Bala asyrap alýshy ata-analar mektebi» onlaın kýrsy birinshiden, oqytý semınarlaryn júrgizetin trenerlerge kómekshi qural retinde ázirlengen. Aldaǵy ýaqytta bul kómekshi qural osy taqyrypqa qyzyǵýshy zertteýshi, izdenýshi azamattarǵa keńinen tanystyrylyp, qalyń buqara nazaryna usynylatyn bolady», dedi ««Rýhanı jańǵyrý» qoǵamdyq damý ınstıtýtynyń basqarma basshysynyń orynbasary, saıası ǵylymdar doktory Qaıdarova Ásem.
Onlaın kýrs kipd.kz platformasynda qoljetimdi bolyp, QQDI-nyń áleýmettik jelilerdegi barlyq akkaýnttarynda ornalastyrylatyn bolady jáne de bala asyryp alýshy ata-analarǵa qatysty qyzyǵýshylyq tanytqan uıymdar men azamattarǵa jeke tabystaý josparlanyp otyr.
Kýrs barysynda bala asyryp alýshy ata-analardy yntalandyrý men balalardyń psıhologııalyq jaraqaty, balalar úıniń tárbıelenýshileriniń erekshelikteri sekildi zertteý taqyryptary qamtylǵan. Qazir oqytý kýrsynyń ekinshi modýli daıyndalýda.
Tanystyrylym barysynda «Otbasy akademııasy» qoǵamdyq qorynyń sarapshysy Zýhra Abrahmanova, «Otbasyn jáne balalardy qoldaý ortalyǵyna» qarasty «SOS Astana Balalar aýylynyń» JBM-niń áleýmettik qyzmetkeri Anastasııa Lıtvınova, jáne de Nur-Sultan qalasy boıynsha «О́mirlik qıyn jaǵdaıdaǵy balalarǵa qoldaý kórsetý ortalyǵy» KMM-niń pedagog-psıholog mamany Túkenova Ásem bala asyrap alýshy ata-analardy oqytýdaǵy ózderiniń tájirbıelerimen bólisti.
«Bala asyrap alýshy ata-analar mektebi» jobasynyń mańyzyn atap ótip, joba bala asyrap alý ınstıtýtynyń damýy men bul salada qyzmet kórsetetin mamandardyń daıarlyǵyn pysyqtaýmen qatar, qoǵamdaǵy jetimder máselesiniń aldyn alýǵa negizdelegen ózekti áleýmettik joba», dedi Otbasy ınstıtýtyn zertteý ortalyǵynyń basshysy Aıgúl Raqysheva.