Elordada Táýelsizdiktiń 30 jyldyǵy qarsańynda kórnekti memleket qaıratkeri Jumabek Táshenovtiń eskertkishi ashyldy. El men jerdiń tutastyǵyn saqtap qalýǵa ólsheýsiz úles qosqan taý tulǵanyń músini Áskerı-tarıhı mýzeı janyndaǵy alańda ornalastyryldy.
Esimi ult jadynan umytylmaıtyn tulǵalar bolady. Sondaı tuǵyrly tulǵanyń biri hám biregeıi Jumabek Táshenov edi. Alash balasy úshin nesimen erek, nesimen bólek bul esim? Ony da aıtaıyq. J.Táshenov Úkimet Tóraǵasy retinde respýblıkanyń saıası, ekonomıkalyq, mádenı damýyna basshylyq jasaǵan jyldary qazaq memleketiniń aýmaq tutastyǵynyń saqtalýyna kóp eńbek sińirdi. Mańǵystaýdy Túrikmenstanǵa qosý jónindegi usynystarǵa toıtarys berdi. Tyń ólkesine biriktirilgen elimizdiń bes birdeı soltústik oblysyn Reseıge, Ońtústik Qazaqstannyń maqta egetin aýdandaryn О́zbekstanǵa berýge qarsy shyqty. Qazaqstan jerinde ıadrolyq jarylystar jasaýǵa qarsylyq bildirdi. Aqyr sońynda arystan júrek azamatqa «ultshyl» degen aıyp tańylyp, N.Hrýshevtiń nusqaýymen qyzmetinen bosatylǵan.
Iá, búgingi táýelsiz Qazaqstan 2 724 902 sharshy shaqyrym jer kólemimen dúnıejúzinde 9-orynǵa taban tirep turǵan bolsa, ol úshin keń-baıtaq jerimizdi aq naızanyń ushymen, aq bilektiń kúshimen qorǵap, urpaǵyna amanattaǵan jaýjúrek ata-babalarymyzben qatar, J.Táshenov syndy qaıratkerge de qaryzdarmyz. Ony halyq umytqan emes. Umytpaıdy da. Osyndaı eren erlikteri úshin bolar, bir kezderi «Ár ýaqytta meniń júregimniń tórinen oryn alatyn meniń er inim – Jumabek», dep tebirendi jazýshy Ǵabıt Músirepov. «J.Táshenov qandaı qyzmette bolsa da – eń aldymen óz eliniń maqsat-múddesinen shyǵatyn, halyqtyń jaǵdaıyn oılaıtyn, ulttyq máselelerdi KSRO basshylarynyń aldynda taısalmaı qoıatyn, júregi qazaq dep soǵatyn birtýar azamat edi», dep tolǵandy Halyq Qaharmany Saǵadat Nurmaǵanbetov.
– Búgin kórnekti memleket qaıratkeri, elimizdiń gúldenýine úlken úles qosqan Jumabek Táshenovke eskertkish ashyp otyrmyz. Osyǵan deıin Nur-Sultanda uly tulǵamyzǵa kóshe aty berilgen bolsa, jýyrda mektepke esimi qoıyldy. Endi mine, kezek eskertkishke kelip otyr. Aǵamyzdyń músini komıssııa músheleriniń, zııaly qaýym ókilderiniń, urpaqtarynyń kelisimimen quıyldy. Búginge deıin Nur-Sultanda elmizdiń tanymal tulǵalaryna arnalǵan birqatar eskertkish ashyldy. Táýelsizdigimizdiń 30 jyldyǵy qarsańynda pandemııaǵa qaramastan, elimizdiń rýhanııatyn kóteretin bastamalar ári qaraı da jalǵasa beredi, – dedi eskertkishtiń ashylý saltanatyna qatysqan Nur-Sultan qalasy ákiminiń orynbasary Ashat Oralov.
Memleket jáne qoǵam qaıratkeri Myrzataı Joldasbekov elimizdiń órkendeýi jolynda eńbek etken asyl azamattarymyz az bolmaǵanyn, solardyń arasynda Jumabek Táshenovtiń shoqtyǵy bıik ekenin aıryqsha atap ótti. Sol sııaqty halqymyzdyń arda tulǵasyna arnalǵan eskertkish qalamyzdyń kórikti oryndarynyń birinen ashylyp otyrǵanyn aıta kele, el rýhanııatynyń damýy jolynda eńbek etip jatqan qala ákimdigine alǵysyn bildirdi.
– Búgingi memlekettik tulǵaǵa ashylyp otyrǵan eskertkish – táýelsizdiktiń jarqyn jemisi. Tarıhı tulǵamyzdyń músini elordamyzdyń tórine ornatylyp otyr. Qýanyshymyz qutty bolsyn! Jumabek Táshenov óz eliniń perzenti retinde el aldyndaǵy paryzyn ótegen tulǵa dep esepteımiz, – dedi memleket jáne qoǵam qaıratkeri Oralbaı Ábdikárimov.
Urpaqtarynyń atynan uly Saıan Jumabekuly men kelini Fatıma Sadyqqyzy sóz sóılep, Elbasyna, Memleket basshysyna alǵysyn bildirdi. «Jurt menen ákeńniń atyn nelikten nasıhattamaısyń, elge sińirgen eńbegin ne úshin aıtpaısyń?» dep surap jatady. Meniń oıymsha elge syıly azamattyń eńbegin halqy ózi baǵalaýǵa tıis. Búgingi ashylyp otyrǵan eskertkish halyqtyń ákeme degen syı-qurmeti dep bilemin», dedi Saıan Jumabekuly.
Eskertkishtiń sáýletshisi – Q.Qorǵanov, músinshi – E.Erjanov. Músin qoladan quıylyp, tuǵyry granıtten qalandy. Eskertkishtiń jalpy bıiktigi – 8,2 metr.