Aqmola oblysynda jańa oqý jyly qarsańynda dástúrli túrde «Mektepke jol» respýblıkalyq qaıyrymdylyq aksııasy ótkiziledi. Memlekettik organdardyń, qoǵamdyq uıymdardyń, bıznestiń ókilderi, óńirdiń demeýshileri men mesenattary balalarǵa kıim, aıaq kıim, mektep kerek-jaraqtaryn satyp alyp, mektepke jınalýǵa belsendi kómektesedi, dep habarlaıdy Egemen.kz oblystyq ishki saıasat basqarmasyna silteme jasap.
Is-shara maqsaty - jańa oqý jylyna daıyndyq kezeńinde jetim balalar men ata-anasynyń qamqorlyǵynsyz qalǵan, az qamtylǵan jáne kóp balaly otbasylardan shyqqan balalardy qoldaý. Is-shara oblystyń barlyq aýdandary men qalalarynda ótkiziledi.
Bilim basqarmasy atap ótkendeı, búginde Aqmola oblysynda kópbalaly jáne az qamtylǵan otbasylardan shyqqan 16 myńnan astam oqýshy bar, olardyń 1123-i birinshi synyp oqýshylary.
«20 tamyzdaǵy jaǵdaı boıynsha «Mektepke jol» aksııasy aıasynda áleýmettik osal otbasylardan shyqqan 12951 oqýshyǵa mektep formasy men keńse jabdyqtaryn satyp alýǵa kómek kórsetildi, sondaı-aq birinshi synypqa baratyn 1046 oqýshyǵa kerek jaraqtar jınaldy», dep habarlady oblystyq vedomstvodan.
Aıta ketsek, ata-analar da «Meniń Atamekenim» portalynda kómek alýǵa ótinim qaldyra alady. Bul platforma kómekke muqtaj adamdar men qaıyrymdylyq jasaýshylar arasynda tikeleı baılanys ornatady.