Búgin, Bas Prokýror Ashat Daýylbaevtyń AQSh-tyń Esirtkige qarsy kúres agenttiginiń Taıaý shyǵys aımaǵy boıynsha aımaqtyq basqarmasy dırektorynyń mindetin atqarýshy Donald Ch. kishi Barnspen kezdesýi bolyp ótti. Bul týraly Bas prokýratýranyń baspasóz qyzmeti habarlady.
Kezdesýge qatysýshylar eki jaqty keń spektorly máseleler boıynsha, eń aldymen esirtkiniń zańsyz aınalymyna qarsy kúreske qatysty pikir almasty.
A.Daýylbaev memlekettiń geosaıası jaǵdaıyn eskere otyryp, nashaqorlyq pen esirtki bıznesine qarsy kúres Qazaqstannyń ýákiletti memlekettik organdarynyń basym baǵyttarynyń biri ekendigin atady. Sondaı-aq ol osy saladaǵy qylmys pen quqyq buzýshylyqtyń aldyn alý boıynsha atqarylyp jatqan jumystar, esirtki qylmysyna qarsy shekaralas memleketterdiń quzyrly organdarymen ózara yqpaldastyq týraly habardar etti. Osyǵan oraı, AQSh-tyń osy saladaǵy tájirıbesin zerdeleýge, jedel aqparattarmen almasýǵa, ózara tıimdi yntymaqtastyqqa daıyn ekendigin bildirdi.
Taraptar transulttyq uıymdasqan esirtki qylmysyna qarsy kúreste kúshterdi biriktirýdiń, esirtkini jetkizý jáne tasymaldaý baǵyttaryn anyqtaýdaǵy agenttiktiń múmkindikterin paıdalanýdyń, osyndaı qylmystardy tergeýdiń aldyńǵy qatarly ádis-tásilderin úırenýdiń mańyzdylyǵyn atap ótti.
Kezdesý barysynda qarjy aǵymdaryn baqylaý tetikterine, odan ári ártúrli ekstremıstik jáne terrorıstik uıymdardy qarjylandyrýǵa baǵyttalatyn esirtkini ótkizýden zańsyz alynǵan paıdany anyqtaýǵa erekshe mán berildi.
Ámirhan Almaǵanbetov.
Derekkóz: Bas prokýratýranyń baspasóz qyzmeti.
Foto: Kazinform.kz.