Búgin, Bas prokýratýrada aımaqtyq prokýratýra organdary jáne kásipkerler palatasy ókilderiniń qatysýymen kásipkerler quqyǵyn qorǵaý máseleleri taqyrybynda beıne konferensııa ótkizildi. Bul týraly Ulttyq kásipkerler palatasy habarlady.
Kezdesý 2013 jyldyń 23 jeltoqsanynda qol qoıylǵan Bas prokýratýra jáne Ulttyq kásipkerler palatasynyń kásipkerler quqyǵyn qorǵaý máseleleri boıynsha ózara yntymaqtastyq týraly memorandým aıasynda ótkizildi. Elimizdiń barlyq óńirlerindegi prokýratýranyń aımaqtyq organdary men óńirlik kásipkerler palatalary arasynda da osyndaı kelisimder jasalǵan.
Jıynda prokýratýra organdary men bıznes-qaýymdastyqtar arasyndaǵy ózara árekettestiktiń ózekti máseleleri talqylandy. Osy oraıda, taraptar memorandýmdy júzege asyrý jónindegi birlesken is-sharalar josparyna qol qoıdy.
Bas Prokýrordyń orynbasary Andreı Kravchenko atap ótkendeı, Memleket basshysynyń «Qazaqstan joly – 2050: bir maqsat, bir múdde, bir bolashaq» atty Qazaqstan halqyna arnaǵan Joldaýynda bıznesti jaqsartý, ákimshilik kedergilerdi joıý jáne zańnamany jetildirýge baǵyttalǵan birqatar is-sharalar qarastyrylǵan. Osyǵan baılanysty Ulttyq kásipkerler palatasynyń basqarma tóraǵasy Abylaı Myrzahmetov jospardyń mańyzdy tarmaqtaryna, atap aıtqanda, prokýratýranyń aımaqtyq organdary men óńirlik kásipkerler palatalarynda «senim telefondaryn» iske qosý, kásipkerler problemalarynyń kartasyn jasaý, «Qýatty bıznes–qýatty Qazaqstan» atty kásipkerlikti damytý jáne qoldaý jobasyn, sondaı-aq basqa da birqatar birlesken jobalardy ázirleý jáne iske asyrý jumystaryna toqtaldy.
Is-sharalar josparynda kásipkerlerden kelip túsetin hattar negizinde olardyń júıeli máselelerin sheshýde ortaq ustanymdy ázirleıtin jumys tobyn qurý qarastyrylǵan. Mundaı jumys toptaryn barlyq óńirlerde qurý josparlanyp otyr.Sonymen birge, ımporttalatyn taýarlardy postkedendik baqylaý kezińde qaıta saralaý, bıznesti júrgizýdegi ákimshilik kedergiler, jeke kásipkerlik sýbektileriniń múlkine qol suǵýshylyq faktilerimen baılanysty kásipkerlerdiń jekelegen ózekti máseleleri tıisti sheshimder men usynymdar aıtyla otyryp talqylandy.
Ámirhan Almaǵanbetov.
Derekkóz: Ulttyq kásipkerler palatasy.
Foto: Ulttyq kásipkerler palatasy.