Shveısarııanyń Jeneva qalasynda Qazaqstan Táýelsizdiginiń 30 jyldyǵyn merekeleý aıasynda «Qazaqstan – BUU: beıbitshilik úshin seriktestik» halyqaralyq konferensııasy ótkizildi, dep habarlaıdy Egemen.kz Elbasy kitaphanasyna silteme jasap.
Is-shara Semeı ıadrolyq polıgonynyń jabylýynyń 30 jyldyǵy men 29 tamyz - Iаdrolyq synaqtarǵa qarsy halyqaralyq kúres kúnine oraı uıymdastyryldy.
Konferensııaǵa qazaqstandyq jáne sheteldik saıasatkerler, ıadrolyq qarýsyzdaný salasyndaǵy sarapshylar, dıplomatııalyq ókildikter men mıssııalardyń ókilderi qatysty.
Elbasy kitaphanasynyń dırektory Baqytjan Temirbolat óz baıandamasynda memleketimiz «ıadrolyq klýb» músheliginen abyroımen bas tartqanyn atap ótti.
«Qazaqstan ıadrolyq qarýdy taratpaý men qarýsyzdaný máselelerindegi ashyqtyq úlgisin álemge is júzinde kórsetti. Bul ashyqtyqty ol syrtqy saıasat irgetasynyń bir kirpishine aınaldyrdy. Nátıjesinde elimiz ıadrolyq qarýdy taratpaý jáne atom energııasyn beıbit maqsatta qoldaný salasyndaǵy barlyq irgeli halyqaralyq sharttarǵa qatysýshy atandy. Qazaqstan Respýblıkasynyń Prezıdenti Qasym-Jomart Toqaev Nursultan Nazarbaevtyń ıadrolyq qarýǵa qarsy bastamalaryn ilgeriletip, halyqaralyq qaýipsizdikti nyǵaıtý jónindegi saıasatty jalǵastyrýda. Memleket basshysy 2019 jyldyń qyrkúıeginde ótken BUU Bas assambleıasynyń 74-sessııasynda álemdi ıadrolyq qarýdan azat etý Qazaqstan úshin negizgi mindetterdiń biri ekenin atap ótken bolatyn», dedi ol óz sózinde.
1949 jyldan 1989 jylǵa deıin Semeı polıgonynda júrgizilgen jarylystyń sany – 456. Bul kórsetkish álem boıynsha júrgizilgen ıadrolyq synaqtardyń 25%-yn quraıdy. Radıasııanyń áserinen 1,5 mıllıonnan astam adam zardap shekti. Sharýashylyq aınalymynan 300 myń sharshy kılometrden astam jer shyǵaryldy.
BUU-nyń Jenevadaǵy bas dırektory Tatıana Valovaıa jahandyq qaýipsizdikti nyǵaıtýǵa Qazaqstannyń qosqan úlesin alǵa tartty.
«40 jyl boıy ıadrolyq synaqtardan kóz ashpaǵan Semeı polıgonyn jabý týraly Tuńǵysh Prezıdentterińiz Nursultan Nazarbaevtyń saıası sheshimi – naǵyz erlik. Bul batyldyqtyń izimen Qazaqstan ıadrolyq qarýsyzdanýǵa baǵyttalǵan kóptegen dáıekti bastamalardy daıyndady. Osy tusta jer jahandy ıadrolyq qarýdan azat etý kúresin jalǵastyrý biz úshin de mańyzdy», dedi Tatıana Valovaıa.
Konferensııa barysynda Ulttyq ıadrolyq ortalyqtyń bas dırektory Erlan Batyrbekov, Iаdrolyq qarýǵa tyıym salý jónindegi halyqaralyq kampanııanyń dırektory Beatrıs Fın, BUU-nyń qarýsyzdaný máselelerin zertteý jónindegi ınstıtýt dırektory Robın Gaıss baıandama oqydy.