Qostanaı oblystyq máslıhatynyń kezekti otyrysynda Dıýshenn mıodıstrofııasy men arqa bulshyq etteri artrofııasyna shaldyqqan bes baldyrǵannyń emine jumsalatyn dáriniń bir bóligin oblystyq bıýdjet esebinen satyp alý týraly sheshim qabyldandy.
Oblysta orfandy aýrýlarǵa shaldyqqan alty bala turady. Balǵyndardyń birin qymbat dári-dármekpen qamtamasyz etý mindetin «О́mirge sen» qory óz moınyna alatyn boldy.
Máslıhat otyrysynda oblystyq bıýdjet densaýlyq saqtaý basqarmasyna 544,5 mln teńge aýdaratyny týraly aıtyldy. Ortaq sheshim boıynsha sırek kezdesetin ári tuqym qýalaıtyn aýyr dertpen aýyratyn balalarǵa qajet «Eteplırsen» jáne «Nýsınersen» dárilerin satyp alýǵa 451,3 mln teńge bólindi. Oblystyq densaýlyq saqtaý basqarmasy basshysynyń mindetin atqarýshy Rústem Aıtbaevtyń sózinshe, qomaqty qarjyǵa satylyp alynatyn bul eki dári tegin medısınalyq kómektiń kepildendirilgen sanatyna enbeıdi.
Biz buǵan deıin Densaýlyq saqtaý mınıstrligine birneshe ret hat jiberip, Qazaqstan Respýblıkasy azamattaryna tegin beriletin dári-dármek tizbesin keńeıtýdi suraǵan edik. Alaıda oǵan áli jaýap alǵan joqpyz. Aldaǵy jyly bul másele óz sheshimin tabar degen úmittemiz», dedi R.Aıtbaev.
Oblystyq ekonomıka jáne bıýdjettik josparlaý basqarmasy basshysynyń mindetin atqarýshy Janna Shaımardanovanyń aıtýynsha, qalǵan 93,2 mln teńge koronavırýs juqtyrǵan naýqastarǵa arnalǵan 30 apparat satyp alýǵa jumsalady. Qurylǵylar satyp alynǵan soń, 12 emdeý mekemesine úlestirilip beriledi.
Qostanaı oblysy