Elordada Jaqsylyq Úshkempirovtiń eskertkishi ashylady, dep habarlaıdy Egemen.kz.
Byltyr tamyz aıynda qazaqtyń dańqty uly, Máskeý Olımpıadasynyń jeńimpazy, álem chempıony, «Qazaqstannyń Eńbek Eri» Jaqsylyq Úshkempirov dúnıeden ótken bolatyn. Daraboz tulǵany halqy eshqashan umytpaıdy.
Sonyń aıǵaǵyndaı, 8 qyrkúıekte Nur-Sultan qalasynda Jaqsylyq Ámiráliulyna ornatylǵan eskertkishtiń ashylý saltanaty ótedi.
Bul is-shara saǵat 11.00-de Nur-Sultan qalasy, Qabanbaı batyr dańǵylyndaǵy Jaqsylyq Úshkempirov atyndaǵy sport saraıynyń aldynda uıymdastyrylady.
Máskeý tórinde atoı salǵan Jaqsylyq aǵa qazaq balýandaryna, jalpy sportshylaryna únemi aǵalyq qamqorlyǵyn kórsetetin. Kásipker retinde mal sharýashylyǵyn damytyp, bir aýylǵa sharapatyn tıgizip, talaı jasty jumyspen qamtydy. Ázirshe osy dańqty azamattan keıin eshbir qazaq balýany Olımpıada altynyn ala almaı keledi.