Qasym-Jomart Toqaev Soltústik Qazaqstan oblysyna jumys sapary barysynda aýyl sharýashylyǵy tehnıkalaryn qurastyratyn «CLAAS» zaýytyna bardy. Prezıdentke zaýytta qurastyrylǵan astyq jınaıtyn traktorlar, kombaındar men tuqym sebetin tehnıkalar kórsetilip, kásiporyndy odan ári damytý josparlary týraly baıandaldy, dep jazady Egemen.kz Aqordaǵa silteme jasap.
Memleket basshysy «CLAAS» kompanııasynyń halyqaralyq bedelin joǵary baǵalap, germanııalyq konsernmen uzaqmerzimdi yntymaqtastyq ornatý qajet ekenin atap ótti.
«CLAAS» ónimderiniń Qazaqstan naryǵyna kelýi bul úlken jetistik. Buny óte iri ınvestısııalyq oqıǵa deýge bolady», dedi Qasym-Jomart Toqaev.
Sonymen qatar Prezıdent osy óńirde birqatar jobalardy júzege asyryp jatqan sheteldik ınvestorlarmen kezdesti.
«CLAAS» kompanııasynyń TMD elderi boıynsha aımaqtyq dırektory Nıls Roıch Memleket basshysyn Qazaqstanda bolashaqta iske asyrmaq ınvestısııalyq jobalarymen tanystyrdy.
Túriktiń «YDA HOLDING» kompanııasynyń basqarma tóraǵasy Arslan Hýseın Petropavlda halyqaralyq JCI standarttaryna sáıkes 625 oryndyq zamanaýı kópsalaly aýrýhana qurylysynyń bastalǵanynan habardar etti.
Arızona ýnıversıtetiniń (AQSh) jahandyq máseleler jónindegi vıse-prezıdenti Brent Ýaıt atalǵan oqý ornynyń Kozybayev University-men yntymaqtastyq ornatý jónindegi josparyn aıtty. Bul kelisim qazaqstandyq joǵary oqý ornyn amerıkalyq bilim berý mekemesindegi akademııalyq tehnologııalarmen qamtamasyz etýge baǵyttalmaq.
Qasym-Jomart Toqaev ınvestısııalyq jobalarmen tanysqannan keıin ınvestorlarǵa el ekonomıkasyn, atap aıtqanda óńirlerdi damytýǵa qosqan úlesteri úshin rızashylyǵyn bildirdi. Memleket basshysy ınvestorlardyń bıznes-jobalarynyń iske asyrylýyn baqylaýda ustaý úshin jeke monıtorıng júrgizetinin atap ótti.