Búgin Qazaqstanda alǵash ret Ulttyq vaksınasııa kúntizbesine sáıkes balalar vaksınalary týraly barlyq qajetti aqparat jınaqtalǵan biryńǵaı resmı resýrs iske qosyldy, dep habarlaıy Egemen.kz.
Bul týraly IýNISEF-tiń baspasóz qyzmeti málimdedi.
BUU Balalar Qory (IýNISEF) Sanıtarlyq-epıdemıologııalyq baqylaý komıtetimen, Qazaqstan Respýblıkasy Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵymen (QR DSM QDSUO), AQSh Halyqaralyq damý agenttiginiń (USAID) qarjylyq qoldaýymen balalardyń josparly vaksınasııasy týraly resmı aqparat pen medısınalyq zertteýlerdiń nátıjeleri jınaqtalǵan saıt ázirledi.
Birneshe aı boıy MedSupport dárigerleri men ǵalymdar toby IýNISEF-pen birlesip qajetti derekterdi iriktep, ata-analar men Qazaqstandaǵy ımmýndaý taqyrybyna qyzyǵýshylyq tanytatyn adamdar úshin EGU.kz saıtynyń qurylymy, ınterfeısi jáne kontentin barynsha qolaıly etý boıynsha jumys júrgizdi.
Aqparattyq resýrsta Ulttyq vaksınasııa kúntizbesine engizilgen árbir vaksınanyń tolyq sıpattamasy bar.
Saıtqa kirgen kez-kelgen adam vaksına qorǵaıtyn ınfeksııalarmen tanysyp, qarsy kórsetilimder men yqtımal janama áserler týraly oqı alady.
Saıttyń iske qosylýymen árbir qazaqstandyq ata-ana aýtızm jáne QPQ vaksınasy týraly mıftiń qalaı paıda bolǵany, nelikten balalar ekpelerinde synap joq ekendigi, sondaı-aq ıneksııa ornyn sýlaýǵa bolatyny álde bolmaıtyny jaıly biletin bolady.
Sondaı-aq vaksınasııa týraly mıfterdiń tolyq tizimi men olardy áshkerleıtin senimdi aqparattar týraly biledi.
«Vaksınasııa máseleleri kópshilik pen buqaralyq aqparat quraldaryn jıi alańdatady. EGU.kz saıtynyń negizgi mindeti – vaksınalar týraly tolyq jáne senimdi aqparat berý jáne respýblıkada vaksınasııalaý jumystaryn uıymdastyrý. Bul platforma vaksınasııa salasyndaǵy tájirıbeli mamandar jáne ǵalymdar men halyqtyń arasyndaǵy ashyq jáne shynaıy dıalogyna arnalǵan, dıalogtyń arqasynda árkim óz suraqtaryna kásibı jáne ǵylymı negizdelgen jaýaptar ala alady», dedi Aıjan Serikbaıqyzy Esmaǵambetova, Qazaqstan Respýblıkasy Densaýlyq saqtaý mınıstrliginiń Sanıtarlyq-epıdemıologııalyq baqylaý komıtetiniń tóraıymy.
Saıt qazaq jáne orys tilderinde qoljetimdi. Kórý qabileti buzylǵan adamdarǵa arnalǵan nusqa da bar.
«Vaksınasııa – ata-analar úshin balalaryn juqpaly aýrýlardyń aýyr zardaptarynan qorǵaýdyń jalǵyz, eń tıimdi jáne balamasy joq ádis. Egu.kz saıtynda siz vaksınasııa týraly durys, dáleldi jáne negizdelgen aqparatty ala alasyz», dedi Qazaqstan Respýblıkasy Densaýlyq saqtaý mınıstrligi Ulttyq qoǵamdyq densaýlyq saqtaý ortalyǵy basqarma Tóraǵasynyń orynbasary Aınagúl Qýatbaeva.
Resmı resýrsta Vaksınasııa kúntizbesi, Vaksınasııa ortalyqtary, Vaksınalar men aýrýlar, mıfter, Suraqtar men jaýaptar sııaqty aıdarlar bar. EGU.kz saıtynda ata-analar vaksınalardyń túrleri týraly aqparatqa qol jetkizip, olardyń qaýipsizdigin tekserýdiń barlyq kezeńderi týraly biledi jáne olardy mazalaıtyn suraqtarǵa jaýap ala alady.
Saıt sonymen qatar vaksınasııa tarıhyna qysqasha sholý jasaıdy jáne vaksınamen basqarylatyn birqatar juqpaly aýrýlardy jeńý jolyndaǵy adamzattyń alǵashqy qadamdaryn sıpattaıdy.
Aldaǵy ýaqytta ol balalardy josparly vaksınasııalaý týraly ózekti statıstıkalyq derektermen tolyqtyrylatyn bolady.
«Vaksınalardy oılap shyǵarý – medısınanyń eń úlken jetistigi. О́zińizdi jáne balańyzdy densaýlyqqa qaıtymsyz zııan keltiretin, keıde ólimmen aıaqtalatyn qorqynyshty aýrýlardan qorǵaýdyń eń tıimdi jáne keıde jalǵyz joly bolyp tabylady. 21 ǵasyrda keıbir ata-analar balalaryn vaksınasııalaýdyń tıimdiligi men qajettiligine qatysty áli de kúmándanýda. Durys jáne aqparattandyrylǵan tańdaý jasaýǵa kómektesý úshin IýNISEF óziniń seriktesterimen birge buryn Qazaqstanda bolmaǵan biregeı saıt ázirledi. Ulttyq vaksınasııa kúntizbesine kiretin vaksınalar týraly barlyq aqparatty tabý ońaı jáne jeńil bolatyn alań. Bul saıt ata-analar úshin óz balasyn vaksınasııalaý týraly mańyzdy sheshim qabyldaýda paıdaly qural bolady dep senemin», dep belgilep ótti Qazaqstandaǵy IýNISEF О́kili Artýr van Dızen.
Saıt turǵylyqty jerge eń jaqyn vaksınasııa ortalyǵyn tabýǵa múmkindik beretin yńǵaıly kartamen jabdyqtalǵan. Balańyzǵa josparly egýdi umytyp ketpeý úshin ata-analar elektrondy kúntizbege vaksınany ýaqytynda qoıý qajettiligi týraly eskertý fýnksııasyn qoldana alady.
«Biz osy jobanyń bir bóligi bolǵanymyzǵa qýanyshtymyz. EGU.KZ saıty qazaqstandyq sábılerdiń qaýipsiz jáne salaýatty balalyq shaǵy úshin ata-analardyń taptyrmas kómekshisi bolady!», dep túsindirdi Medsupport Komandasy.
Saıt IýNISEF Qazaqstan men Qazaqstan Respýblıkasy Densaýlyq saqtaý mınıstrliginiń ımmýndaý júıesin kúsheıtý jónindegi birlesken baǵdarlamasy sheńberinde ázirlengen.
«Immýndaý ómirdi ǵana qutqaryp qoımaıdy, sondaı-aq balalarǵa, áıelderge jáne otbasylarǵa órkendeýge múmkindik beredi. Bul mańyzdy veb-saıtta berilgen aqparat adamdarǵa vaksına arqyly aldyn alatyn aýrýlardyń qaýpinen qorǵanýǵa kómektesedi. Nátıjesinde balalar mektepte bolyp, ata-analar óz otbasyna qamqorlyq jasap, qoldaý kórsetý arqyly óz qoǵamdastyǵy men eliniń ekonomıkalyq ósýine yqpal ete alady», USAID/Ortalyq Azııa mıssııasy dırektorynyń mindetin atqarýshy, Pıter Iаng.