Densaýlyq saqtaý mınıstrligi mektep medısınasyn jańǵyrtý aıasynda balalardyń profılaktıkalyq medısınalyq tekserýlerin jańa formatta ótkizýdi josparlap otyr, dep habarlaıdy Egemen.kz.
Mınıstrliktiń málimetinshe, qazirgi tańda mektep oqýshylaryn profılaktıkalyq tekserý júıesinde basty nazar balalardyń densaýlyǵyn jan-jaqty tekserýden góri, statıstıkalyq kórsetkishterge kóbirek aýdarylyp kelgen. Sonyń saldarynan kóptegen aýrý belgileri der kezinde anyqtalmaı otyr.
Aýyrmaıtyn jol izde: Profılaktıkalyq mádenıet qalyptasyp kele me?
Ana men bala densaýlyǵyn saqtaý departamentiniń dırektory Maǵrıpa Embergenovanyń aıtýynsha, beıindi mamandardyń tapshylyǵy men jumys júktemesiniń tyǵyzdyǵy bir balany tekserý ýaqytynyń kemýine jáne dıagnostıkanyń sapasyzdyǵyna ákep soǵady.
«Sonymen qatar erekshe bilim berýdi qajet etetin jáne múgedektigi bar balalardy esepke alýdyń jetkiliksizdigi de ózekti másele bolyp qalyp otyr», dedi ol.
Jańa júıe aıasynda mektepter sıfrlyq elektrokardıograftarmen, pýlsoksımetrlermen, boı men salmaq ólsheıtin qurylǵylarmen, otoskoptarmen jáne telemedısınalyq keshendermen jabdyqtalady. Barlyq málimet avtomatty túrde aqparattyq júıelerge jiberilip otyrady. Aldaǵy ýaqytta bilim berý uıymdaryn ıntraoraldy kameralarmen, plantograftarmen jáne avtorefraktometrlermen qosymsha jaraqtandyrý kózdelgen.
Tarazda mektep aýmaǵynda bıiktikten qulaǵan oqýshy aýyr jaraqat aldy
Densaýlyq saqtaý mınıstri Aqmaral Álnazarova bala densaýlyǵyna qatysty barlyq málimetter «Balanyń elektrondyq densaýlyq pasportynda» júıeli túrde jınaqtalýy tıis ekenin aıtty.
«Balalardyń densaýlyǵyna qatysty derekter júıeli túrde jınaqtalyp, ómir boıy súıemeldenýi tıis. Bul aýrýlardy erte anyqtap, medısınalyq baqylaýdyń tıimdiligin arttyrýǵa múmkindik beredi», dedi mınıstr.
Mınıstrliktiń habarlaýynsha, jańartylǵan formatty elimizdiń barlyq mektebinde kezeń-kezeńimen engizý 2026 jylǵy 1 qyrkúıekten bastalady.
Asyljan QURMANǴALI