Reseı Prezıdentiniń elimizge memlekettik sapary aıasynda júrgizilgen kelissózderden keıin Qasym-Jomart Toqaev pen Vladımır Pýtın BAQ ókilderi aldynda birlesken málimdeme jasady, dep habarlaıdy Egemen.kz.
Qasym-Jomart Toqaev Reseı Prezıdentiniń memlekettik sapary tabysty ótkenin jetkizip, eki eldiń strategııalyq seriktestigi men odaqtastyq qatynastarynyń jylnamasyna enetinine senim bildirdi.
«Búgingi qol qoıylǵan qujattar men ýaǵdalastyqtar Qazaqstan − Reseı seriktestiginiń sıpatyna saı. Onyń máni – dástúrli dostyq pen tatý kórshilik qatynastardy barlyq saladaǵy ortaq progreske umtylyspen ushtastyrý. Sóz sońynda eki el baılanystaryn órbitýge qosqan tarıhı úlesi úshin Reseı Federasııasynyń Prezıdenti Vladımır Pýtınge shynaıy rızashylyǵymdy bildiremin. Sizdiń saparyńyzdyń qorytyndysy san qyrly memleketaralyq yntymaqtastyǵymyz aıryqsha sıpatqa ıe ekenin taǵy da rastady. Baýyrlas halyqtarymyzdyń ıgiligi úshin birge kúsh jumyldyryp, strategııalyq seriktestik pen odaqtastyq qatynastarymyzdy nyǵaıtatyn jolǵa batyl qadam basamyz», dedi Qazaqstan Prezıdenti.
Reseı Prezıdenti búgingi kelissózderdiń iskerlik jáne konstrýktıvti sıpaty eki eldiń dostyq jáne tatý kórshilik qarym-qatynasyna saı keletinin aıtty.
«Biz saıasat, ekonomıka, mádenı-gýmanıtarlyq salalardaǵy ekijaqty yqpaldastyqtyń negizgi máselelerin talqyladyq. Halyqaralyq kún tártibindegi ózekti taqyryptardy qozǵadyq. Qazaqstan − Reseı baılanysyn nyǵaıtýdyń basym mindetteri bekitilgen birlesken málimdemege qol qoıdyq. Energetıka, qarjy sektorlarynan bastap, densaýlyq saqtaý jáne bilim berý sekildi túrli salany qamtıtyn mańyzdy úkimetaralyq jáne vedomstvoaralyq qujattar qabyldandy. Kelissózder barysynda ekonomıkalyq yqpaldastyqqa basa nazar aýdaryldy. Byltyr eki eldiń taýar aınalymy shamamen 29 mıllıard dollardy qurady. 30 mıllıard dollarlyq mejege batyl qadam basyp kelemiz. Taıaý arada bul kórsetkishti de eńseretinimizge esh kúmán joq. Búgingi sapar men kelissózder halyqtarymyzdyń ıgiligi úshin Reseı − Qazaqstan san qyrly yntymaqtastyǵyn odan ári nyǵaıtýǵa serpin bererine senimdimin», dedi Vladımır Pýtın.
Sonymen qatar, Memleket basshysy Qazaqstanǵa tórt Amýr jolbarysynyń ákelinýin Reseı Prezıdentiniń memlekettik sapary aıasyndaǵy aıtýly oqıǵa dep atady. Eske salaıyq, keshe Reseı Prezıdenti Vladımır Pýtın Qazaqstanǵa memlekettik saparmen keldi.