QR Premer-Mınıstriniń orynbasary Eraly Toǵjanovtyń tóraǵalyǵymen QR aýmaǵynda koronavırýstyq ınfeksııanyń taralýyna jol bermeý jónindegi vedomstvoaralyq komıssııanyń (VAK) otyrysy ótti, onda vaksınasııalaý boıynsha júrgiziletin reıdterdiń Algorıtmi maquldandy, dep jazady Egemen.kz.
Algorıtmdi Densaýlyq saqtaý mınıstrligi, múddeli memlekettik organdar jáne «Atameken» UKP ázirledi.
Reıd barysynda monıtorıngtik top buryn anyqtalǵan buzýshylyqtardan bólek, kásiporyn qyzmetkerleriniń COVID-19 vırýsyna qarsy ekpeniń birinshi komponentin alǵan-almaǵanyn tekseredi.
Qyzmetkerler sany 50 adamnan asatyn jáne ujymdaǵy adamdardyń 60%-dan azy COVID-19 vaksınasynyń birinshi komponentin saldyrǵan kásiporyndardyń tizimi jobalyq keńseniń Vaksınasııa kartasy negizinde jasalady.
Mobıldik top (MT) reıdin tirkeý tártibi InfoKazakhstan elektrondyq platformasynda júzege asyrylady.
MT obektige shyǵý kezinde jumys berýshi ekpe alǵan jáne vaksınasııalaýdan bosatý týraly qujattary bar qyzmetkerlerdi (7 kúnnen aspaıtyn merzimdegi PTR-zertteýler, turaqty/ýaqytsha medısınalyq qarsy kórsetkishter nemese saýyqqannan keıin 3 aı ishinde COVID-19 aýyryp jazylǵan adamdar) kórsete otyryp, tolyq tizim (aty-jóni, JSN) usynady.
MT iriktemeli túrde (qyzmetkerler sany 50-den 200 adamǵa deıin – qyzmetkerlerdiń keminde 10%-y, 201-den 500-ge deıin-keminde 5%, 501-den 1000-ǵa deıin-keminde 3%, 1000-nan joǵary-keminde 1%) ASHYQ qosymshasy arqyly qyzmetkerlerdiń mártebesin tekseredi jáne jumys berýshi usynǵan qyzmetkerler tizimimen salystyryp tekseredi.
«Jasyldan» basqa mártebesi bar qyzmetkerler anyqtalǵan jaǵdaıda, onyń vaksınasııasyz jumys ornynda bolý quqyǵyn beretin aqparat (anyqtama) suratylady.
Vaksınasııa tártibiniń buzylǵany rastalǵan jaǵdaıda MT naqty osy tulǵalardy kórsete otyryp materıaldar qalyptastyrady jáne keıinnen sheshim qabyldaý úshin SES organdaryna jiberedi. Kásiporynǵa (basshyǵa ne ózge ýákiletti tulǵaǵa) vaksınasııalanbaǵan jumyskerlerdi qyzmet obektisine jiberýdi shekteý qajettiligi túsindiriledi.
Sanıtarııalyq-epıdemıologııalyq qyzmet organdary MT-tan kelip túsken materıaldardyń negizinde obektige sanıtarııalyq-epıdemııaǵa qarsy jáne sanıtarııalyq-profılaktıkalyq is-sharalar júrgizý týraly Qaýly beredi.
MT Qaýlyda belgilengen merzim ishinde qyzmetkerlerdi jumys oryndaryna negizsiz jiberý faktilerin qaıta anyqtaǵan kezde jumys berýshini QR ÁQBtK sáıkes ákimshilik jaýapkershilikke tartý týraly másele qaralady.
Jergilikti atqarýshy organdar obektilerge ákimshilik sharalardy qoldaný nátıjeleri boıynsha onyń Ashyq jobasyna qatysýyn toqtata turady.
Bul týraly COVID-19 taralýyna jol bermeý jónindegi VAK habarlady.