QR QM Memlekettik kirister komıteti tóraǵasynyń orynbasary Jaıdar Ińkárbaev kóleńkeli ekonomıkaǵa qarsy is-qımyl jónindegi is-sharalar jospary ózektendiriletinin aıtty, dep habarlaıdy Egemen.kz.
«Memleket basshysynyń bıylǵy Joldaýynda bıýdjet kirisin ulǵaıtý boıynsha bergen tapsyrmasyn oryndaý úshin aýqymdy jumystar júrgizilýde. Atap aıtqanda, shaǵyn jáne orta bıznestiń josyqsyz sýbektilerin kóleńkeden shyǵarý, qolma-qol aqshasyz aınalymdardy ákimshilendirý jáne fıskaldyq zańnamany saqtaý baǵyttary kúsheıtiledi. Bul rette prosesterdi sıfrlandyrýǵa basty nazar aýdarylýda», dedi ol Ortalyq kommýnıkasııalar qyzmetindegi baspasóz máslıhatynda.
Onyń aıtýynsha, kóleńkeli ekonomıkanyń úlesin 2025 jylǵa deıin 40 paıyzǵa tómendetý úshin QR Qarjylyq monıtorıng agenttigimen birlesip, ekonomıkanyń barlyq salalary men baǵyttar boıynsha Kóleńkeli ekonomıkaǵa qarsy is-qımyl jónindegi is-sharalar josparyn ózektendirý jóninde jumystar júrgizilýde.
«Ult josparynyń 42-qadamyn oryndaý úshin 2021 jylǵy 1 qańtardan bastap jalpyǵa birdeı deklarasııalaý kezeń-kezeńimen engizildi. Jalpyǵa birdeı deklarasııalaýǵa kóshý kóleńkeli aınalymdy, sybaılas jemqorlyq deńgeıin tómendetedi jáne memlekettik bıýdjetke qosymsha túsimderdi qamtamasyz etedi. Halyqaralyq málimetterdi elektrondy túrde almasý aıasynda biz kópjaqty konvensııaǵa qol qoıdyq. QR azamattarynyń qarjylyq shottary boıynsha 100-den astam ıýrısdıksııada aqparat almasýdy bastaýdy josparlap otyrmyz. Búgingi kúni deklarasııany 476 myń adam nemese jalpyǵa birdeı deklarasııalaýdyń birinshi kezeńiniń 99 paıyzy usyndy. О́tinish berýdiń eń tanymal tásili e-Salyq Azamat mobıldi qosymshasy bolyp otyr. Onyń kómegimen deklarasııanyń 52 paıyzy usynyldy», dep tolyqtyrdy Jaıdar Ińkárbaev.