Tehnıka parkin jańartýǵa úles

«Astyq-STEM» JShS kompanııalar toby «QazAgroQarjymen» Soltústik Qazaqstanda 2008 jyldan beri jumys isteıdi. Sońǵy birneshe jylda kompanııanyń mashına-traktor parkin jańartý maqsatynda 1 mlrd 776 mln teńge somasyna tehnıka satyp alyndy. Sonyń ishinde, 2021 jyly «QazAgroQarjy» uıymymen 640 mln teńge somasyna, onyń ishinde sýarýǵa arnalǵan jabdyq – «tamshylatqysh júıeler» týraly lızıng sharttary jasalǵan eken. Bul bıylǵy respýblıkanyń kóptegen óńirinde bolǵan ekstremaldy qýańshylyq jaǵdaıynda óte paıdaly boldy.

«Astyq-STEM» jaýap­ker­shiligi shekteýli seriktestiginiń ózi 2002 jyly qurylǵan, onyń egistiginiń jalpy aýdany 9 829 ga quraıdy, negizinen dándi da­qyl­dar, sonymen qatar maıly, jem­shóptik daqyldar ósiredi. Mal basy 500 tuıaq sútti qara maldan turady.

Baspasóz týrynda sóılegen sózinde «ASTYQ-STEM» JShS basshysy Sergeı Zvolskıı óziniń «QazAgroQarjy» ınstıtýtynyń ju­mysyna rızashylyǵyn bil­dirdi.

«Biz osy qarjy kompanııasy arqyly sapaly tehnıkalar alýǵa qol jetkizip otyrmyz. So­nyń ishinde bıyl tamshylatyp sýaratyn tehnıkalar aldyq. Sonyń nátıjesinde qýańshylyq bolǵan jyldyń ózinde kartop pen sábizden joǵary ónim aldyq. Sábizdiń gektar berekeligi tipti 100 tonnaǵa jetti, kartoptan da sondaı ónim alýdy boljap otyrmyz», dedi ol.

«QazAgroQarjy» – aýyl sha­rýa­shylyǵy taýarlaryn óndi­rý­shilerge tehnıka men jabdyqtar satyp alýda lızıngtik qyzmet kórsetetin qarjy ınstı­týty retinde 2000 jyly quryl­ǵany bel­gili. Kompanııa elimizdiń agrar­lyq sektoryndaǵy tehnıkalyq jaraqtandyrýdy damytýǵa yqpal ete otyryp, óz qyzmetin 20 jyldan astam ýaqyt boıy oıdaǵydaı jú­zege asyryp keledi. Osy jyldar ishinde ol sharýalardyń arasynda tanymal kompanııaǵa aınaldy. 2021 jyldyń naýry­zy­nan bastap «Báıterek» ulttyq bas­qarýshy holdıngi» AQ qura­myna endi.

Qazir «Báıterek» holdıngi Mem­leket basshysynyń tap­syrmasymen agroónerkásiptik blok­tyń enshiles kompanııalaryn qaı­ta uıymdastyrý boıynsha ju­­mystaryn jalǵastyrýda. Fer­merler úshin tıimdi bolǵan qar­jylandyrý ınstıtýtynda da ózgerister bolýy múmkin. Son­dyqtan da «QazAgroQarjy» kompanııasy men onyń fılıaldary óz jumystaryn ashyq, tıimdi júr­gizip, pandemııaǵa qaramastan sharýalarǵa tehnıkany lızıngke áperýdi belsendi júrgizip jatyr. Bıyl ǵana kompanııa 6 myń birlikten asa tehnıka satyp alýdy qarjylandyrdy. Bul – traktor, kombaın, egis keshenderi jáne t.b. sııaqty sharýaǵa asa qajet tehnıkalar. Kompanııanyń barlyq óńirde 14 fılıaly bar.

Barlyq qyzmet etý kezeń­inde kompanııanyń aýyl sharýa­shylyǵyna salǵan ınvestı­sııa­larynyń kólemi – 1 031,6 mlrd teńgeni qurady, bul bıýdjetten tys jasalǵan ınvestısııalar kó­le­miniń – 77%-y.

Aıta ketetin bolsaq, búgingi tańǵa deıin Soltústik Qazaqstan oblysynyń dıqandary barlyq 3 mln gektarǵa jýyq egis alqa­by­nyń 60 paıyzdan artyǵyn jınap aldy. Taıynsha aýdanynda bolǵan baspasóz týrynda jýrnalısterdi astyq alqaptaryna da aparyp, qaınaǵan tirlikti kórsetti. Munda barlyq astyqtyń jartysy jınalyp alynǵan.

Soltústik Qazaqstan oblysy