Úndistandaǵy Karnataka bıligi kórshi Kerala shtatynda qaýipti Nipah vırýsy tabylǵannan keıin birqatar aýdandarda joǵary dabyl rejımin jarııalady, dep habarlaıdy Egemen.kz.
Úndistannyń Kerala shtatyndaǵy 11 adamda ólimge ákeletin Nipah vırýsynyń belgileri anyqtaldy, dep habarlady RIA Novostı aımaqtyń densaýlyq saqtaý mınıstrligine silteme jasap.
Bul adamdardyń barlyǵy Nipah vırýsynan qaıtys bolǵan 12 jastaǵy balamen baılanysta boldy. Bala qaıtys bolǵannan keıin shtat dárigerleri onymen baılanysqan 251 adamǵa karantın jarııalady.
Keraladan kelgender, Karnataka Densaýlyq saqtaý mınıstrliginiń usynystarynda aıtylǵandaı, qyzba, psıhıkalyq jaǵdaıdyń ózgerýi, qatty álsizdik, bas aýrýy, tynys alýdyń buzylýy, jótel, qusý, bulshyqet aýrýy, qurysýlar jáne dıareıa sııaqty belgilerdiń bolýyn baqylaý kerek.
Karnataka Densaýlyq saqtaý mınıstri Keshava Sýdhakardyń aıtýynsha, shtatta bul qaýipti aýrýdyń birde-bir jaǵdaıy tirkelgen joq.
Nipah vırýsy jarqanattar men tyshqandarmen taralady. Dúnıejúzilik densaýlyq saqtaý uıymy bul vırýsty álemdegi eń qaýipti dep atady. Oǵan qarsy dári-dármekter men vaksınalar joq, al aýrýdyń ólim deńgeıi - 75%-dy quraıdy.
Sondaı-aq, DDSU Nipah vırýsyna baılanysty pandemııanyń bastalý múmkindigi týraly eskertti.