Almaty oblysynda medısınalyq mekemeni tekserý kezinde esirtki jáne psıhotroptyq preparattardy saqtaý faktisi anyqtaldy. Bul týraly QR IIM esirtki qylmysyna qarsy is-qımyl departamenti basqarmasynyń bastyǵy Baqytjan Ámirhanov málimdedi, dep habarlaıdy Egemen.kz.
«6-12 qyrkúıek aralyǵynda esirtki quraldarynyń, psıhotroptyq zattar men prekýrsorlardyń zańdy aınalymyndaǵy buzýshylyqtardy anyqtaý boıynsha «Dármek» operasııasynyń kezekti kezeńi ótkizildi. Alty kún ishinde polısııa 865 sýbektini, onyń ishinde 599 dárihanany, 24 qoımany, 205 emdeý-aldyn alý mekemelerin, sondaı-aq 37 ónerkásiptik kásiporyndy tekserdi. Nátıjesinde 1,2 tonna prekýrsor aınalymy shektelgen», dedi Baqytjan Ámirhanov brıfıngte.
Onyń aıtýynsha, operasııa esirtkige uqsas dári-dármekterdi reseptisiz bosatýdy anyqtaýǵa baǵyttalǵan.
Ol jedel aldyn alý is-sharasy barysynda 18 qylmystyq quqyq buzýshylyq, onyń ishinde 17 esirtki zattarymen jumys isteý erejelerin buzý, bir zańsyz medısınalyq jáne farmasevtıkalyq qyzmet jáne reseptilerdi zańsyz berý nemese qoldan jasaý anyqtalǵanyn aıtty.
«Almaty oblysynda medısınalyq mekemeni tekserý kezinde esirtki jáne psıhotroptyq preparattardy saqtaý faktisi anyqtaldy: morfın - 417 ampýla, promedol - 255 ampýla, fentonıl - 100 ampýla, relanıým - 140 ampýla lısenzııasyz. QR QK 303 - baby 1-bóligi boıynsha sotqa deıingi tergeý bastaldy», dedi Baqytjan Ámirhanov.
IIM aqparaty boıynsha, baqylaýdaǵy zattar aınalymy salasynda 93 ákimshilik quqyq buzýshylyq, onyń ishinde 28 obektini tehnıkalyq nyǵaıtý talaptaryn buzý jáne lısenzııalaý normalarynyń segiz faktisi anyqtaldy.
«Preparattardy reseptisiz bosatýdyń 57 faktisi anyqtaldy. Qoldanystaǵy zańnamany buza otyryp saqtalǵan nemese satylatyn quramynda esirtki bar barlyq preparattar, ıaǵnı esirtki quraldarynyń 1343 ampýlasy jáne 1 myńnan astam tabletka men psıhotroptyq zattardyń 1206 ampýlasy aınalymnan alyndy», dep qorytyndylady Ámirhanov.