SARAP sarapshylar klýbynda óńirlik saıasatty jetildirý máselesi talqylandy, dep jazady Egemen.kz.
Otyrysty ashqan «Rýhanı jańǵyrý» qazaqstandyq qoǵamdyq damý ınstıtýtynyń basqarma tóraǵasy Asylbek Esenbaev óńirlik saıasat Memleket basshysynyń Joldaýlarynda basty oryn alatynyn aıtty.
«Memleket basshysy bıylǵy Joldaýynda aldyńǵy eki bastamaǵa negizdelgen ıdeıalardy jalǵastyra otyryp, óńirlik saıasat máseleleriniń problemalyq spektrin tolyqtyrady jáne keńeıtedi. Prezıdent tapsyrmalarynyń jıyntyǵy boıynsha osy strategııalyq qujatta О́ńirlik damý baǵdarlamasynyń naqty tetikteri qarastyrylǵan», dedi Asylbek Esenbaev.
Onyń aıtýynsha, bıýdjet shyǵyndaryna basymdyq berý - óte durys jáne mańyzdy másele.
«Qazir óńirlerdiń bıýdjetin qalyptastyrý kezinde jurtshylyqty tartý, sondaı-aq shyǵyndardy baqylaý qajet ekeni anyq. «Bıýdjetke qatysý» túrli óńirlerde sátti synaqtan ótti, bul jergilikti ózin-ózi basqarýdy damytýdaǵy pármendi qadamdardyń biri», dedi spıker.
Jergilikti ózin-ózi basqarýdy damytýdyń 2025 jylǵa deıingi tujyrymdamasynda azamattardy memlekettik basqarý prosesine belsendi tartý maqsatynda ákim saılaýyn engizý jónindegi sharalar aıqyndalǵan.
«Bıyl aýyl ákimderin tikeleı saılaý ótkizildi. Bul saıası reformaǵa jasalǵan úlken qadam. Ekinshi qadam aýdan ákimderin saılaý múmkindigi bolmaq. Bul sharalardyń barlyǵy azamattardyń múddesin sapaly júzege asyrýǵa baǵyttalǵan», dedi qoǵam qaıratkeri, Shoqan Ýálıhanov atyndaǵy Kókshetaý memlekettik ýnıversıtetiniń áleýmettik-mádenı damý jónindegi prorektory Ǵalym Baıtuq.
E.A. Bóketova atyndaǵy Qaraǵandy ýnıversıtetiniń saıasattaný jáne áleýmettaný kafedrasy meńgerýshisi mindetin atqarýshy Eldos Jumaǵulov 2024 jyly ótetin aýdan ákimderin saılaý elimizdiń saıası ómirindegi mańyzdy oqıǵa bolatynyn atap ótti.
«Saılaý ınstıtýtyn damytý - azamattardyń memleket isterine qatysý quqyǵyn iske asyrýdyń mańyzdy tásili. Máselen, Qaraǵandy oblysyndaǵy aýyl ákimderin saılaýǵa elektorattyń 75%-i qatysty, onyń ishinde «Aýyl», «Aqjol», «Adal» sııaqty partııalardyń ókilderi jeńiske jetti. Buny progressıvti saıası ózgeris dep aıtýǵa bolady», dedi Eldos Jumaǵulov.
Sonymen birge Memleket basshysy Joldaýynda: «Halyq únine qulaq asatyn memlekettiń» basty qaǵıdaty – memlekettik apparat azamattardyń múddesi úshin jumys isteýge tıis», dep atap ótti. Bul eń aldymen jergilikti bılikke qatysty. El Prezıdenti ákimdikterge azamattarmen ózara is-qımyl jasaý jáne olardyń problemalaryn jedel sheshý qajettigin atap ótti. Osylaısha, óńir basshylyǵy jergilikti ekonomıkany damytýǵa, sonyń saldarynan turǵyndardyń ál-aýqatyn arttyrýǵa baǵyttalýǵa tıis», dep jazylǵan baspasóz habarlamasynda.
Jambyl oblysy ákimi apparaty basshysynyń orynbasary Nurlan Kúntýov óńirde azamattardyń áleýmettik kóńil-kúıin jaqsartý úshin qabyldanyp jatqan sharalar týraly aıtty.
«Bizdiń óńirde budan ári azamattardyń ómir súrý uzaqtyǵyn 74,4 jasqa deıin ulǵaıtý josparlanyp otyr. Búginde oblysta medısınalyq qamtamasyz etý deńgeıi 88%-ti quraıdy. Memleket basshysynyń Joldaýynda aıtylǵan 1 000 mektep salý týraly bastamaǵa qatysty óńirde búginde 23 jańa mekteptiń qurylysy júrip jatyr», dedi Nurlan Kúntýov.
Otyrys barysynda Qaraǵandy oblysynyń «Rýhanı jańǵyrý» RО́B basshysy Aıtbaı Jumaǵulov, sarapshylar Erlan Medeýbaev, Dına Aıkenova jáne t. b. sóz sóıledi.
SARAP klýbynyń otyrysynda sarapshylar Qazaqstannyń óńirlik saıasatyn jetildirý barlyq óńirdiń údemeli jáne teńgerimdi áleýmettik-ekonomıkalyq damýyna baǵyttalǵanyn atap ótti.
Is-sharany Aqarat jáne qoǵamdyq damý mınıstrliginiń qoldaýymen «Rýhanı jańǵyrý» qazaqstandyq qoǵamdyq damý ınstıtýty uıymdastyrdy.