Qaıtys bolǵan órt sóndirýshilerdiń otbasylaryna memlekettik nagradalar tabys etildi, dep jazady Egemen.kz.
Qazaqstan Prezıdenti Qasym-Jomart Toqaev Jambyl oblysynda áskerı qoımadaǵy órtti sóndirý barysynda qaıtys bolǵan qutqarýshylar men áskerı qyzmetshilerdi marapattady.
Shymkent qalasyna jumys saparymen barǵan Tótenshe jaǵdaılar mınıstri Iýrıı Ilın jáne qala ákimi Murat Áıtenovpen birge Jambyl oblysy TJD О́rt sóndirý jáne avarııalyq-qutqarý jumystary qyzmeti №1 mamandandyrylǵan órt sóndirý bóliminiń órt sóndirýshisi-qutqarýshysy Turmanov Jánibek Jasuzaqulynyń aǵasyna III dárejeli «Aıbyn» ordenin tabys etti.
Tústen keıin Iýrıı Ilın Jambyl oblysynyń Taraz qalasyna bardy. Tótenshe jaǵdaılar mınıstri men oblys ákimi Berdibek Saparbaev Jambyl oblysy TJD О́rt sóndirý jáne avarııalyq-qutqarý jumystary qyzmetiniń qaıtys bolǵan órt sóndirýshileriniń týystaryna memlekettik nagradalardy tabystady.
Áskerı jáne qyzmettik boryshyn atqarýda kórsetken erligi men janqııarlyǵy úshin marqum Zaıkın Sergeı Vladımırovıch Jambyl oblysy TJD О́rt sóndirý jáne avarııalyq-qutqarý jumystary qyzmeti № 3 órt sóndirý bóliminiń qaraýyl bastyǵy I dárejeli «Aıbyn» ordenimen, № 4 órt sóndirý bóliminiń órt sóndirýshileri-qutqarýshylary Ádilbek Ádilet Qanatbekuly men Keńes Álibı Beksultanuly, № 1 mamandandyrylǵan órt sóndirý bóliminiń avtomobıl júrgizýshisi-qyzmetkeri Qýatbek Ǵafan Jomartuly III dárejeli «Aıbyn» ordenimen marapattaldy.
Sharaǵa qatysýshylar jarylys saldarynan qaıtys bolǵan órt sóndirýshilerdi bir mınýt únsizdikpen eske aldy. Iýrıı Ilın Jambyl oblysynda bolǵan qaıǵyly oqıǵa saldarynan qaıtys bolǵan órt sóndirýshilerdiń týǵan-týystaryna kóńil aıtty.
Mınıstr óz sózinde azamattyq qorǵaý organdarynyń qyzmetkerleri olardyń otbasylaryna aldaǵy ýaqytta da qoldaý kórsetetinin, al balalary Tótenshe jaǵdaılar mınıstrliginiń Málik Ǵabdýllın atyndaǵy Azamattyq qorǵaý akademııasyna túsýge nıet bildirse, kómek kórsetiletinin atap ótti.