Pavlodarda №22 mektep dırektory 6-synyp oqýshysyna qatysty áreketine baılanysty jazalandy, dep habarlaıdy Egemen.kz Pavlodar oblysy bilim basqarmasynyń resmı saıtyna silteme jasap.
«Mektep dırektoryna sógis jarııalandy. Oqýshynyń ata-anasymen baılanystyq, olardyń narazylyǵy joq. Oqýshy da jaǵdaıdy túsindi, janjal tyıyldy», dep málimdedi basqarma.
Mektep dırektoryna 6-synyp oqýshysynyń oqý ornyna kıinip kelgen kıimi unamaǵan, sol sebepti oqýshyny jetektep basqa synyptarǵa kirgizgen. Dırektordyń bul áreketinen keıin qyz jylap qalǵan. Soǵan baılanysty oqýshynyń ákesi áleýmettik jelidegi paraqshasynda pikir bildirdi.
«Pavlodarda №22 mektep dırektory Mámbetova hanym 6-synyp oqýshysyn qolynan jetektep, aldymen 5-synypqa, sodan keıin 11-synypqa aparyp, barlyǵyna onyń talapqa saı kıinbegenin kórsetken. Qyz jylap, kúızeliske tústi», dep jazdy Facebook qoldanýshysy Qanat Qazbek.
Ol muǵalim óz ókiletin asyra paıdalanyp, bala quqyǵyn buzdy dep sanaıtynyn jetkizdi.
Jelidegi bul jazbaǵa mektep dırektory Maıra Mámbetova pikir bildirdi.
«Oqýshyǵa djınsy men fýtbolkaǵa qatysty aýyzsha eskertý jasaldy. Mysal retinde kórshi kabınette oqıtyn oqýshylardyń klassıkalyq úlgidegi kıimi kórsetildi. Qyz renjip qaldy. Otbasynan keshirim suraldy. Qazir qyz qala syrtynda, kelgen soń psıhologııalyq kómek kórsetiledi», dedi ol.
Buǵan deıin Qazaqstannyń bilim mınıstrligi oqý jylynda qazaqstandyq oqýshylar mindetti mektep formasyn kııýden bosatylyp, mektepke klassıkalyq kıimmen bara alatynyn aıtqan.