Rýhanı qazynamyz tolyǵa tústi

Otyrysqa Memlekettik hatshy, «Rýhanı jańǵyrý» baǵdarlamasyn júzege asyrý jónindegi ulttyq komıssııa tóraǵasy Qyrymbek Kósherbaev, ulttyq komıssııa quramyndaǵy Úkimet músheleri men Prezıdent Ákimshiliginiń basshylary, ulttyq joǵary oqý oryndarynyń jetekshileri, ǵalymdar men aýdarmashylar qatysty. Elimizdegi barlyq JOO rektoraty men oqytýshylar quramy onlaın formatta qosyldy.

Otyrysta Aqparat jáne qoǵamdyq damý mınıstri Aıda Balaeva, Bilim jáne ǵylym mınıstri Ashat Aımaǵambetov, «Ulttyq aýdarma bıýrosy» qoǵamdyq qorynyń dırektory Raýan Kenjehanuly, Qazaq ulttyq qyzdar pedagogıkalyq ýnıversıtetiniń rektory Gúlmıra Qanaı jáne ǵalym-aýdarmashy Moldııar Ergebek, Ulybrıtanııadaǵy Kembrıdj ýnıversıteti baspasynyń bilim reformasyna jaýapty dırektory Djeın Mann sóz sóıledi.

Qyrymbek Kósherbaev óz sózinde Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń bastamasymen ómirge kelgen «Rýhanı jańǵyrý» baǵdarlamasynyń qoǵam úshin asa mańyzdy, keshendi bastama ekenin aıtty. Baǵdarlama aıasynda birneshe aýqymdy joba iske asty. Olar elimizdegi ǵylym men bilimdi, qoǵamdyq sanany jańa deńgeıge kóterýge septigin tıgizýde. Osy maqsatta Qazaqstannyń zııatkerlik tarıhynda buryn-sońdy bolmaǵan kólemdi de kúrdeli ǵylymı aýdarma jobasy jasaldy.

2017 jyldyń sáýirinde Elbasy Nur­sultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqa­lasy jarııalandy. Osy maqala negizinde «Rýhanı jańǵyrý» keshendi baǵdarlamasy qabyldandy, ony úılestiretin arnaıy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııa quryldy. Baǵdarlama aıasyndaǵy aýqymdy jobalar tól mádenıetimizdi, ulttyq dildi, qoǵamdyq sanany jańa ýaqyt talabyna beıimdep, jańǵyrtýdyń altyn ózegine aınaldy. Bul týraly Aqparat jáne qoǵamdyq damý mınıstri Aıda Balaeva baıandady.

«Qazirgi ýaqytta «Rýhanı jańǵyrý» baǵdarlamasynyń alty baǵyty boıynsha 16 arnaıy joba iske asyrylýda. О́ńirlik jobalyq keńselerdiń de jumysy júıelendi, jobalarǵa taldaý jáne ádistemelik qoldaý jasaıtyn «Qazaqstandyq qoǵamdyq damý» ınstıtýty quryldy. Memleket basshysy Qasym-Jomart Kemeluly Toqaevtyń tapsyrmasyna sáıkes 2021 jyldan bas­tap «Rýhanı jańǵyrý» baǵdarlamasy «Qoǵamdyq sanany ulttyq jańǵyrtý kezeńine ótkizýge arnalǵan jol kartasy» formatyna kóship, Úkimettiń qaýlysymen ulttyq joba retinde daıyndaldy. Ulttyq joba aıasynda josparlanǵan is-sharalar qundylyq baǵyty boıynsha jáne jas erekshelikterine sáıkes toptastyryldy», dedi mınıstr.

Aıda Balaeva baǵdarlama aıasynda iske asqan arnaıy jobalardyń nátıjelerine toqtalyp ótti. Vedomstvo basshysynyń aıtýynsha, «Týǵan jer» jobasy negizinde demeýshilik qarajat esebinen 7 myńǵa tarta áleýmettik nysan salyndy. Osy baǵytta óńirlik ınfraqurylymdyq obektilerdi damytýǵa jalpy quny 280 mlrd teńge quraıtyn demeýshilik jasaldy. Jobaǵa 13 myńnan asa mesenat qatysty. Nátıjesinde, eldegi qaıyrymdylyq jáne mesenattyq mádenıet jańa serpin aldy. «Qasıetti Qazaqstan» jobasy aıasynda jalpyulttyq mańyzy bar tanymal oryndar men nysandar tizimi keńeıtildi. Jalpyulttyq mańyzǵa ıe 206 nysan, óńirlik mańyzǵa jatatyn 575 nysan anyqtalyp, elimizdiń kıeli jerleriniń kartasy men eki tomdyq ensıklopedııasy shyqty. Respýblıkanyń túkpir-túkpirinde 28 tarıhı nysan qaıta jańǵyrtýdan ótkizilip, «Bozoq», «Botaı» jáne jańartylǵan «Saraıshyq» qoryq-mýzeıleri ashyldy.

Jıyn barysynda «100 jańa oqýlyq» jobasynyń mańyzy, gýmanıtarlyq ǵylym salalaryn damytýdaǵy róli, aýdarma jumysyn júzege asyrý ádistemesi men tájirıbesi, oqýlyqtardyń mazmuny men aýdarma sapasy, qazaqstandyq aýdarma mektebin damytý máseleleri keńinen tal­qylandy. «Ulttyq aýdarma bıýrosy» qoǵamdyq qorynyń dırektory Raýan Ken­jehanuly 4 jylda aýdarylǵan oqý­lyqtar fılosofııa, áleýmettaný, psıhologııa, dıplomatııa, dintaný, lıngvıstıka, semıotıka, pedagogıka, ınternet psıhologııa­sy, mádenıettaný, antropologııa, jýrnalıs­tıka, ekonomıka, menedjment, marketıng, kásipkerlik, halyqaralyq quqyq, zııatkerlik quqyq, kınotaný, teatrtaný, shyǵys fılosofııasy, kóshbasshylyq, medıa, etnografııa sekildi baǵyttardy qamtyǵanyn atap ótti. Aýdarylatyn kitaptardy tańdaý úshin elimizdiń barlyq oqý ornynan usynys jınaldy. Jınaqtalǵan tizim negizinde birneshe ret basylǵan, sońǵy basylymy keı̆ingi 3 jylda shyqqan, mazmundyq turǵydan beı̆tarap degen talaptarǵa sáı̆kes ǵylymı ádebıet, akademııalyq bestseller eńbekter tańdaldy. Aýdarylǵan oqýlyqtar gýmanıtarlyq bilim salasy mazmunynyń túbegeıli jańarýyna jol ashty.

Otyrysqa qatysýshylardyń baıandamalaryn muqııat tyńdaǵan Qyrymbek Kósherbaev Ulttyq komıssııa atynan birqatar tapsyrma berdi.