Qazaqstannyń Tuńǵysh Prezıdenti – Elbasy kitaphanasy men bas qaladaǵy Ulttyq akademııalyq kitaphananyń uıytqy bolýymen «Qazirgi álemdegi qoǵamnyń mádenı-tarıhı murasyn saqtaýdaǵy kitaphananyń róli» atty halyqaralyq konferensııa ótti.
Jıynda Elbasy kitaphanasynyń dırektory Baqytjan Temirbolat ózi basqaryp otyrǵan mekemeniń qyzmetine toqtalyp, kitaphanalardyń negizgi mindeti – bilimdi jınaqtaý, saqtaý jáne berý ekendigin basa aıtyp ótti.
− Bul mıssııanyń ózektiligi búginde kúsheıip otyr. Adamzat keler kúnnen oryn alar zańdylyqtardy anyqtaý úshin tarıhqa úńilse, sol tarıhty qamtıtyn baǵa jetpes ǵylymı aqparatty kitaphanalar nasıhattaıdy. Elbasy kitaphanasy tarıhı aqparatty jınaqtaý men saqtaý turǵysynan klassıkalyq kitaphanalarǵa jaqyn, − dedi ol.
Al elordadaǵy Ulttyq akademııalyq kitaphana dırektory Úmithan Muńalbaeva Memleket basshysy Qasym-Jomart Toqaevtyń «balanyń oqýǵa degen qyzyǵýshylyǵy, qorshaǵan ortany kitap arqyly tanýy mektep qabyrǵasynda qalyptasý kerek. Al kitaphana oqýshynyń sol yntasyn oıatyp, ony qyzyqty kitap álemine jeteleýi qajet» degen sózin aıta kelip: «Búginde, álem jańa synaqtardy eńserip, onyń ishinde pandemııamen kúresip jatqanda, adamnyń ózin damytýǵa, jetildirýge bos ýaqyty bar. Bul jaǵdaıda kitaphana – izdenýde kómekke keler birinshi qural», − dedi.
Sondaı-aq konferensııada Halyqaralyq kitaphanalyq qaýymdastyqtar men mekemeler federasııasy (IFLA) jáne AQSh-taǵy Kamarılo kópshilik kitaphanasy men Kanadadaǵy Vankýver kópshilik kitaphanasynyń qatysýshylarǵa quttyqtaý haty oqylsa, Máskeýdegi Reseı memlekettik kitaphanasy bas dırektorynyń syrtqy baılanystar jáne kórme qyzmeti jónindegi orynbasary Natalıa Samoılenko rýhanı-mádenı qundylyǵy mol basylymdardy elektrondy nusqaǵa kóshirýdiń mańyzdylyǵyn sóz etti.
Fransııa ulttyq kitaphanasy halyqaralyq baılanystar bóliminiń qyzmetkeri Jeraldın Shatlar mekeme qorynda qazaq tilinde jazylǵan 130-dan astam ádebıettiń saqtaýly turǵanyn jetkizip: «Kitaphanamyzdyń murasyn keńinen taratýǵa múddelimiz. Adamzattyń mádenı mırasyn saqtaý úshin biz álem kitaphanalarymen jumys isteımiz. Osy oraıda tájirıbemizben, ıdeıalarymyzben, ozyq bilimimizben bólisýge daıynbyz», dedi. Sankt-Peterbýrgtegi B.N.Elsın atyndaǵy prezıdenttik kitaphananyń aqparattyq resýrstar dırektory Elena Jabko «Reseıdiń mádenı murasy: ony saqtaý men keńinen taratýdaǵy kitaphanalardyń róli» taqyrybynda baıypty baıandama jasady.
Sonymen qatar jıynda fılologııa ǵylymdarynyń doktory, professor Iırjı Shıma (Praga), Túrkııa ulttyq kitaphanasy baspasynyń bas dırektory Alı Odabasha (Ankara), Estonııa ulttyq kitaphanasy halyqaralyq baılanystar bóliminiń meńgerýshisi Marı Kannýsaar (Tallın), Belarýs Respýblıkasy Jazýshylar odaǵy (Mınsk) tóraǵasynyń orynbasary Elena Stelmah, M.I.Rýdomıno atyndaǵy shetel ádebıeti kitaphanasynyń (Máskeý) bas dırektory Pavel Kýzmın, «Qarjy jańalyqtary» slovakııalyq ınternet-basylymynyń bas redaktory Vladımır Bachıshın jáne Qazaqstan Jazýshylar odaǵynyń tóraǵasy, aqyn Ulyqbek Esdáýlet pen pýblısıst Sádibek Túgel qatysyp, kitaphana salasy týraly ózekti oılary men usynystaryn ortaǵa saldy.