Qyrǵyzstannyń Talas oblysynan О́zbekstannyń Tashkent oblysyna tikeleı týnnel salý jobasyn qalpyna keltirý jospary jarııalandy. Bul týraly prezıdenttiń Talas oblysy boıynsha ókili Baqytbek Narbekov málimdedi, dep habarlaıdy Egemen.kz.
Bul joba Keńes Odaǵy kezinde jasalyp, biraq oryndalmaı qalǵan.
«Biz jobany qaıta bastaý úshin ınvestorlardy izdeımiz. Týnneldiń uzyndyǵy 5,7 km bolýy kerek. Eger ol salynsa, Talas pen Tashkent arasyndaǵy qashyqtyq 630 km-den 120 km-ge deıin qysqarady. Bul aıtarlyqtaı utymdy. Qazir Talas óńiri tek Qazaqstanmen ekonomıkalyq baılanysta. Biraq týnnel salynǵannan keıin О́zbekstanmen saýda, týrızm jáne t.b. baǵyttarda qarym-qatynas artady. Tashkent oblysynda 18 aýdan bar, al halqynyń sany 8 mıllıonǵa jýyq. Bul biz úshin jańa naryqqa aınalady. Týnnel jobasy 1 mıllıard somǵa deıin eseptelgen», deıdi Baqytbek Narbekov.