Qostanaı oblysynda birneshe sheneýnik kásipkerlerdi zańsyz teksergeni úshin zań aldynda jaýap beretin boldy. Byltyr Memleket basshysy Qasym-Jomart Toqaevtyń bastamasymen shaǵyn jáne orta bıznes nysandaryn tekserýge úsh jylǵa deıin moratorıı jarııalanǵanyna qaramastan, Sarykól aýdanynyń memlekettik qyzmetshileri sol óńirde qoqys polıgonyn ustaıtyn «Tazalyq-Sarykól» seriktestigine tekseris joryǵyn jıiletip jibergen.
Mezgilsiz kelip, berekesin alǵan sheneýnikterden mezi bolǵan seriktestik basshysy Sarykól aýdandyq prokýratýrasy janyndaǵy kásipkerler quqyǵyn qorǵaý jónindegi mobıldi topqa shaǵymdanady. Prokýratýra men kásipkerler palatasynyń ókilderinen quralǵan mobıldi top tekseristiń zańsyz uıymdastyrylǵanyn anyqtap, kinálilerdi ákimshilik jaýapkershilikke tartyp otyr.
– Osy jylǵy 3 maýsymda, 1 shildede jáne 3 tamyzda atalǵan polıgondy tekserý barysynda toltyrylǵan komıssııalyq tekseris hattamalary zańsyz dep tanyldy. Sarykól aýdanynyń prokýrory kásipkerlik nysannyń isine zańsyz aralasqany úshin aýdandyq ákimdikke qarasty Sáýlet, qurylys, turmystyq-kommýnaldyq sha- rýashylyq, jolaýshylar kóligi jáne avtomobıl joldary bóliminiń basshysy men Sarykól aýylynyń ákimin Ákimshilik quqyq buzýshylyq týraly kodeksiniń 173-baby boıynsha ákimshilik jaýapkershilikke tartyp otyr, – dep málimdedi oblystyq kásipkerler palatasy basshysynyń orynbasary Danııar Kúzenbaev.
Bul bap boıynsha kásipkerlik qyzmetke zańsyz aralasyp, olardyń qyzmetine kedergi keltiretin zańsyz hattama toltyrǵan laýazym ıeleri endi 100 aılyq eseptik kórsetkish mólsherine deıin aıyppul arqalamaq.
Atalǵan sheneýniktermen birge Memlekettik kirister basqarmasynyń Sarykól aýdanyndaǵy bas mamany da jaýapkershilikke tartylyp otyr. Oǵan ÁQB kodeksiniń 175-baby boıynsha jeke kásipkerlik nysandaryna tekserý júrgizý tártibin buzǵany úshin 25 aılyq eseptik kórsetkish mólsherinde aıyppul salynýy múmkin.
Aıta ketý kerek, kásipkerler quqyǵyn qorǵaý jónindegi mobıldi toptar bıylǵy 4 qyrkúıekten bastap jańa ókilettikke ıe bolyp otyr. Atap aıtqanda, «Prokýratýra týraly» zańǵa engizilgen túzetýlerge sáıkes endi prokýrorlar ózderine shaǵymdanǵan kásipkerlerdiń isi boıynsha derbes tekserý júrgizip, istiń aq-qarasyn anyqtaý maqsatynda aqparat surastyryp, zańsyz qoldanylǵan shekteý nemese tyıym sharalarynyń kúshin joıa alady.
Qostanaı oblysy