28 qyrkúıekte Shymkent qalasynda Qazaqstan halqy Assambleıasy tóraǵasynyń orynbasary M.Ázilhanov QHA qurylymdarynyń basshylarymen jáne qalanyń etnomádenı birlestikteriniń tóraǵalarymen kezdesti, dep habarlaıdy Egemen.kz.
Is-sharaǵa QR Aqparat jáne qoǵamdyq damý mınıstrligi Etnosaralyq qatynastardy damytý komıtetiniń tóraǵasy Ǵalym Shoıkın, qala ákiminiń orynbasary Shyńǵys Muqan qatysty.
Kezdesýde Memleket basshysynyń «Halyq birligi jáne júıeli reformalar – el órkendeýiniń berik negizi» Joldaýyn iske asyrýǵa Qazaqstan halqy Assambleıasynyń qatysýy jaıynda, sondaı-aq óńirdegi etnosaralyq kelisimdi nyǵaıtý jónindegi sharalar talqylandy.
M.Ázilhanov Prezıdenttiń jańa Joldaýynyń erekshe mańyzdylyǵyn, Joldaýdyń «Ulttyń uıysýy – odan ári damýdyń basty faktory» dep atalatyn jetinshi bólimi tatýlyq pen kelisim saıasaty máselelerine arnalǵanyna aıryqsha toqtaldy.
«Bıylǵy Joldaý – el birligin saqtaýdyń mańyzyn jáne Táýelsizdikti nyǵaıtý qajettiligin uǵyndyratyn aıryqsha qujat. Barshamyzdy biriktiretin qundylyqtardyń arqasynda biz 30 jyl tatýlyq pen kelisimde ómir súrip kelemiz, táýelsiz Qazaqstandy qurdyq, Táýelsizdiktiń urpaǵyn ósirdik», dep atap ótti spıker. Ol qalalyq assambleıa ókilderin jańa Joldaýdy júzege asyrýǵa belsendi atsalysýǵa shaqyrdy.
M. Ázilhanov atap ótkendeı, Shymkent qalasynyń QHA aǵartýshylyq jáne áleýmettik-baǵdarlyq jumysqa basa nazar aýdarýy tıis, etnomádenı birlestikter jáne olardyń belsendileri – óz etnostarynyń toptarymen ózara tyǵyz is-qımyl jasaýǵa, qyzmettiń jańa nysandaryn qarastyrýǵa baǵyttalýy asa mańyzdy.
Jıynǵa qatysýshylar qalalyq QHA, «Qoǵamdyq kelisim» mekemeleri men Dostyq úıleriniń qyzmetin jobalyq tásildeme men máni qaǵıdatynda qaıta qurý qajet, óńirlerde etnosaralyq qatynastarǵa teris áser etetin naqty áleýmettik máselelerdi sheshýge basymdyq berilýi tıis degen tujyrymǵa keldi.
Is-sharada QHA «Jańǵyrý joly» jastar qozǵalysynyń qalalyq shtabynyń tıimdi qyzmetin qamtamasyz etý, turaqty negizde túsindirý jumystaryn júrgizý qajettiligi aıtyldy. О́ńirlik deńgeıde jastar saıasatyn iske asyrýda onyń keshendi yqpaldasýyn qamtamasyz etken jón.