Shymkent qalasynyń qurmetti azamattaryn tanytý maqsatynda qala ákimdigi «Qurmetti azamattar sıklyn» usynyp otyr, dep habarlaıdy Egemen.kz.
Sıkldyń maqsaty – keńestik kezeńnen bastap Táýelsizdik jyldary arasyndaǵy Shymkent qalasynyń qurmetti azamaty atanǵan, qalanyń damýyna tulǵa retinde adamgershiligi, eńbek jolymen eńbegi sińgen tarıhtaǵy ejelgi jáne jańa esimderdi búgingi urpaqqa nasıhattaý.
Osy oraıda gelmıntologııa ǵylymyn damytýǵa sińirgen eńbegi úshin jáne týǵanyna 90 jyl tolýyna baılanysty Qazaq SSR Eńbekshi depýtattary Shymkent qalalyq Soveti atqarý komıtetiniń 1968 jylǵy 29 qazanyndaǵy №412 sheshimimen «Shymkent qalasynyń Qurmetti azamaty» ataǵyna ıe bolǵan Konstantın Ivanuly Skrıabın esimin usynamyz.
Skrıabın Konstantın Ivanuly 1878 jyly 7 jeltoqsanda Peterbýrg (Lenıngrad, Sankt-Peterbýrg) qalasynda týyp, 1972 jyly 17 qazanda Máskeý qalasynda qaıtys bolǵan. Ulty orys. 1905 jyly Estonııanyń qazirgi Tartý qalasyndaǵy mal dárigerlik ınstıtýtyn bitirgen.
K.I.Skrıabın gelmıntterdiń morfologııa, bıologııa, fılogenııa, júıelenim, ekologııa, epızootologııa jáne epıdemıologııasyn zerttegen. Ol gelmıntterdiń 200-den astam ǵylymǵa beımálim jańa túrin ashyp, olarǵa ǵylymı sıpattama bergen. Gelmıntologııalyq tolyq zertteý ádisin usynyp, ǵylymǵa gelmıntterdiń rezervýarly qosymsha ıeleri týraly uǵym engizgen, degelmıntızasııa prınsıpterin paıymdaǵan, gelmıntterdi tolyq joıý (devastasııa) teorııasynyń negizin salǵan.