Májilis tóraǵasy Nurlan Nyǵmatýlın jańa Ekologııa, geologııa jáne tabıǵı resýrstar mınıstri Serikqalı Brekeshevke eskertý jasady, dep jazady Egemen.kz.
Májilistiń jalpy otyrysynda Kaspıı teńiziniń teńiz ortasyn qorǵaý týraly zań jobasyn talqylaý kezinde depýtat Janarbek Áshimjanov mınıstrge memlekettik tilde birneshe suraq qoıdy.
«Bizdiń respýblıkadaǵy qandaı uıymdar Kaspıı teńiziniń bıologııalyq resýrstary boıynsha zertteý júrgizedi? Mundaı zertteýlerge qandaı qarjy kózderi paıdalanylady? Kaspıı teńiziniń florasy men faýnasyn zertteý boıynsha basqa Kaspıı memleketterimen birlesken jobalar men baǵdarlamalar bar ma? Saýalǵa memlekettik tilde jaýap berýińizdi ótinemin», dedi depýtat.
Mınıstr Serikqalı Brekeshev saýalǵa orys tilinde jaýap berýge ruqsat surady.
«Suraǵyńyzǵa rahmet. Men memlekettik tilde jaýap bere almaımyn. Qazaq tilin bilmegendikten emes, oıymdy tolyq jetkize almaımyn. Osyǵan baılanysty, ruqsat etseńiz, orys tilinde jaýap bergim keledi», dedi ol
Májilis Tóraǵasy Nurlan Nyǵmatýlın bul suraqtyń sáıkesinshe memlekettik tilde qoıylǵanyn jáne jaýapty qazaq tilinde berý kerek ekenin atap ótti.
«Siz bizge birinshi ret keldińiz. Biraq depýtat óte oryndy aıtty. Ol memlekettik tilde suraq qoıdy, kelesi joly suraqqa memlekettik tilde jaýap berińiz. Siz parlamentke keldińiz, suraq qazaq tilinde boldy, siz qazaq tilinde jaýap berýińiz kerek. Iá, siz shetelde oqydyńyz, shet tilderin bilesiz, biraq siz mınıstrsiz, sondyqtan qazaq tilinde sóıleýińiz kerek», dep basa aıtty Májilis tóraǵasy.