Jarty jylǵa jýyq óskemendikter Semeımen eki ortada sabylysyp qalǵan. О́skemen áýejaıy jóndeýge jabylyp, ushaqtar qart qaladaǵy Abaı áýejaıynan ushyp-qonyp jatty. Kóńili kúpti halyq Ertistiń kópirine uqsap saǵyzsha sozylmasa eken dep te tilegen. «Kóp tilegi kól». Ýaqtyly aıaqtalyp, 1 qazannan bastap iske qosyldy.
Ashylǵan kúni-aq oblys ortalyǵynan Nur-Sultan, Almaty qalalaryna ushaqtar ushty. Aǵymdaǵy jyldyń mamyr aıynan bastap О́skemen áýejaıy «Nurly jol» memlekettik baǵdarlamasy aıasynda ushý-qoný jolaǵynyń kúrdeli jóndelýine baılanysty jabyldy. Ushý-qoný jolaǵyn uzartý jáne keńeıtý boıynsha jumystar júrgizildi.
– Merdigerler ushý-qoný jolaǵyndaǵy asfalt-beton jabynyn tolyǵymen almastyryp, ony ulǵaıtý jumystaryn júrgizdi. Endi uzyndyǵy 2 800 metr, eni 60 metr. Mundaı parametrler áýejaıǵa halyqaralyq reısterdiń úlken laınerlerin qabyldaýǵa múmkindik beredi. Sondaı-aq jolaqqa jaryq sıgnaldyq jabdyqtyń jańa zamanaýı júıesi ornatyldy, – deıdi «О́skemen áýejaıy» AQ prezıdenti Nıkolaı Korolenko.
Áýejaı basshysynyń aıtýynsha, sońǵy ret osyndaı aýqymdy jumystar oblys ortalyǵynyń áýe aılaǵynda 1996 jyly júrgizilipti. 25 jylǵa jýyq kúrdeli jóndeý júrgizilmegen aılaq ábden eskirgen. Sondyqtan da jóndeý jumystary jedel túrde qajet boldy. Barlyq jumystar aıaqtalǵan soń arnaıy komıssııa qabyldady. Quramyna jol qurylysy mamandarymen qatar, Azamattyq avıasııa komıtetiniń ókilderi de boldy.
Aıta ketsek, tekserý jumystary 15-21 qyrkúıek aralyǵynda jaryq sıgnaldyq jáne aeronavıgasııalyq jabdyqtar júıesinen bastaldy. Qazirgi ýaqytta Air Astana, SCAT jáne Qazaq Air avıakompanııalarynyń úsh baǵyttaǵy, ıaǵnı Nur-Sultan, Almaty jáne Qaraǵandy reısteri jańartylýda. Jaqyn arada baǵyttar sany da, oblys ortalyǵyna jáne odan ushatyn avıakompanııalar sany da artady.
Al áýejaıdyń júk áleýetin arttyrý úshin bıyl 30 tonnalyq júk termınaly men syıymdylyǵy 100 tonna ýaqytsha saqtaý qoımasynyń qurylysyn aıaqtaý josparda bar. Mundaı sharalar ótkizý qabiletin jaqsartýdy qamtamasyz etedi jáne júk avıatasymaldaryn damytýǵa múmkindik beredi.