Osy aptada Otbasy bank jańa ónimin tanystyrdy. Ol Baspana market dep atalady. Bul – qazaqstandyqtardyń turǵyn úıdi tańdaýǵa memlekettik baǵdarlamalarǵa qatysýǵa, sondaı-aq qaıtalama naryqtan páter satyp alýǵa múmkindik beretin elimizdegi biregeı portal. Budan bólek, Baspana market arqyly Otbasy bankiniń menshikti baǵdarlamalary aıasynda qurylys salýshylardan ońtaıly baspana tańdaýǵa múmkindik bar.
Baspana market-tiń kómegimen qazaqstandyqtar nysannyń tolyq sıpattamasyn, qoljetimdi páterler sanyn, quny men bólmelerdiń ornalasý jobasyn egjeı-tegjeıli anyqtap kóre alady. Jańa sıfrly platformada laıyqty múlikti tapqannan keıin, ony sol jerde brondap, jeke kabınette satyp alý barysyn baqylaýǵa bolady.
Eger qoldanýshy jańa úı alýdy kózdese, platforma arqyly qurylys salýshydan keńes alý úshin onlaın-ótinim joldaı alady. Al tańdaǵany ekinshi naryqtaǵy baspana bolsa, atalǵan múlikti Otbasy bankinen nesıe alý úshin kepilzat retinde usynýǵa qanshalyqty jaramdy ekenin birden kórýge múmkindik bar.
Sondaı-aq Baspana market qurylys salýshylar úshin Otbasy bankimen ózara qarym-qatynas ornatýǵa yńǵaıly sıfrly alańǵa aınalmaq. Bul jerde qajetti qujattardy tirkep, bankpen yntymaqtastyq jóninde elektrondy ótinim joldap, «Otbasy bankiniń» keń aýdıtorııasyna qurylys salýshylar óz páterlerin satýǵa shyǵara alady.
– Qazirgi ýaqytta bankte baspana alý úshin qarajat jınaqtap otyrǵan 2 mln-nan astam salymshy bar. Olardyń barlyǵy jyljymaıtyn múlik naryǵyndaǵy áleýetti satyp alýshylar. Salymshylarǵa yńǵaıly bolý úshin ári ýaqyttaryn únemdeý úshin biz úıdi bir jerden tańdap, tipti onlaın ıpoteka rásimdeýge múmkindik beretin marketpleısti iske qostyq. Bul sıfrly qyzmet pen qarapaıym adamgershiliktiń ushtasýy. Biz Baspana market-tegi onlaın ıpotekanyń kómegimen 10 myńǵa jýyq nesıe berýdi josparlap otyrmyz, – deıdi Otbasy bank AQ basqarma tóraǵasy Lázzat Ibragımova.
Onlaın ıpoteka – synaq rejiminde jumys istep turǵan qanatqaqty joba. Ol kommersııalyq naryqtan jańa nemese qoldanysta bolǵan turǵyn úı satyp alǵysy keletin bank klıentterine qol jetimdi bolady. Qazir dál osyndaı nesıe túrin rásimdeý úshin bank bólimshesine 9 ret barý qajet. Onlaın ıpoteka ashylsa, bankke eki ret qana kelýge bolady.
Qyzmettiń jańa túrin Baspana market-te ornalasqan jeke kabınet arqyly paıdalanýǵa bolady. Ol jerde áleýetti qaryz alýshy satyp alý-satý kelisimi aıaqtalǵanǵa deıin ózine jeke taǵaıyndalatyn beınekeńesshimen baılanysa alady. Keńesshi aldyn ala esep júrgizip, qujattar tizimin aıtyp, nesıe somasynyń aldyn ala maquldanǵan kólemi jóninde aqparat bere alady. Ári qaraı, klıent ózine unamdy baspana taýyp, ony baǵalatady. Múlikti baǵalaý qujattary daıyn bolǵan kezde, beınebaılanys operatory nesıelik ótinimdi toltyrýǵa kómektesip, klıentke onyń jaǵdaıy týraly habarlaıdy. Eger bank oń sheshim shyǵarsa, operator satyp alý-satý kelisimin rásimdeý úshin notarıýsqa baratyn yńǵaıly ýaqytty brondaýǵa kómektesedi.
Osy prosesten keıin ǵana bolashaq qaryz alýshy quqyq belgileıtin qujattardy usyný úshin aldymen bank fılıalyna, keıin nesıelik kelisim men ony óteý kestesine qol qoıý úshin bank bólimshesine barady.