Tobyl óńirinde jergilikti ózen-kólderden aýlanǵan balyqtardy konservileıtin jańa kásiporyn jumys isteı bastady. Táýelsizdiktiń alǵashqy jyldary iske qosylǵan Qostanaı konservi zaýytynyń janynan ashylǵan shaǵyn kásiporyn aldaǵy ýaqytta balyq pashtetterin shyǵarýdy da kózdep otyr.
Et konservileý zaýytynyń dırektory Nıkıta Renkastyń aıtýynsha, kásiporyn bıyl memlekettik baǵdarlamanyń kómegimen balyq konservileıtin avtomattandyrylǵan zamanaýı qurylǵy ornatqan. Bul óndiris kólemin jylyna 23 mln konservige deıin ulǵaıtýǵa múmkindik berip otyr. Qazir munda syrttan ákelinetin teńiz balyqtary men jergilikti ózen-kól ónimderinen 15 túrli qańyltyr qutyly konservi jabylady.
– Basty maqsat – turǵyndardy jergilikti túlik pen balyq etinen jasalǵan sapaly konservilermen qamtamasyz etý. Biz balyqpen qatar, burynnan mal, qus etterin buqtyryp konservileýmen aınalysamyz. Zaýyt shyǵaryp jatqan et konservileriniń bárine Qostanaı oblysynda ósirilgen túlik ónimderi shıkizat retinde paıdalanylady, – dedi kásiporyn basshysy.
Bıyl konservi zaýyty «Qarapaıym zattar ekonomıkasy» baǵdarlamasy arqyly «First Heartland Jýsan Bank» AQ-dan 104 mln teńge nesıe alyp, oǵan jeke ǵımarat satyp alyp, kúrdeli jóndeý jasap, balyq konservileıtin zamanaýı qurylǵy ornatqan. Nesıe ósiminiń jartysyn «Damý» qory arqyly memleket ótep beredi.
Búginde birneshe adam jumys isteıtin jańa kásiporyn bir aýysymda 20 myńǵa jýyq balyq konservisin shyǵarady. Daıyn ónimder kúndelikti kólikke tıelip, jergilikti sýpermarketterge jóneltilip otyrady.
– Jańa óndiristik jeli tamyz aıynda ashyldy. Muny óte sátti joba deýge bolady, óıtkeni qazirdiń ózinde tabys ákele bastady. О́nim kólemi aı sanap ulǵaıyp keledi. Búginde tomat pen maıǵa buqtyrylǵan shabaq, syrttan keletin seld jáne Tobyl óńirindegi balyq sharýashylyqtarynan ákelinetin móńke, sazan, shortan balyqtaryn konservilep jatyrmyz. Jergilikti ónimniń ótimi jaman emes, negizi ózen-sý balyqtary teńizdikine qaraǵanda paıdaly bolady. Teńiz jaǵalaýyndaǵy elderde ózen-kól balyǵyna suranys joǵary ekeni tegin emes, – dedi Nıkıta Renkas.
Táýelsizdiktiń alǵashqy jyldary ashylǵan Qostanaı konservi zaýyty uzaq jyldardan beri elimizdiń kúsh qurylymdary men kenshilerdi sapaly et konservilerimen qamtamasyz etip keledi. Búginde kásiporyn óz ónimderin negizinen Qostanaı, Aqmola oblystary men el astanasyna jiberip jatyr.