Jaıyq ózeniniń jaǵalaýynda atyraýlyq qolóner sheberleri men dızaınerler úshin arnaıy alleıa ashyldy. Onda ár aptanyń sońynda «Ulttyq qolóner – tárbıe kózi» atty kórme-jármeńkesi ótedi. Oǵan oblystyq «Isker áıelder» keńesi men Atyraý qalalyq ákimdigi qoldaý kórsetip otyr.
– Kórme-jármeńkeniń basty maqsaty – kásipkerlerdi qoldaý, olardyń ónimin ótkizýine jaǵdaı jasaý. Sondaı-aq erekshe naqyshtaǵy ulttyq qolóner týyndylary arqyly qazaq halqynyń salt-dástúrin, tarıhyn, mádenıetin keńinen dáripteý, – deıdi Atyraý qalasy ákiminiń orynbasary Samat Embergen.
Jas dızaıner Álbına Sıǵýatovanyń aıtýynsha, bul – jas kásipkerlerge otandyq ónimderin usynýǵa arnalǵan tıimdi joba. Munda usynylatyn ár ónimniń sapasy joǵary, baǵasy tutynýshyǵa qoljetimdi bolmaq.