Búgin, Astanada Esil aýdandyq sotynda 2009 jyly ulttyq sanaqqa bólingen 758 mln.teńgeni jymqyrdy dep aıyptalǵan Statıstıka agenttiginiń burynǵy tóraıymy Anar Meshimbaevaǵa qatysty sot úkimi shyqty. Bul týraly «Qazaqstan» telearnasy habarlady.
Ol senip tapsyrylǵan bóten múlikti ysyrap qylǵany jáne qyzmettik ókilettigin teris paıdalanǵany úshin 7 jylǵa bas bostandyǵynan aıyryldy. Alaıda, sot prosesi barysynda Statıstıka agenttiginiń burynǵy basshysy eki bap boıynsha ózine taǵylǵan kináni moıyndamady.
«Qylmystyq Kodekstiń 176-baby 3-bóliginiń «b», «g» tarmaqtary boıynsha senip tapsyrylǵan bóten múlikti ysyrap etkeni, sondaı-aq, qyzmettik ókilettigin teris paıdalanǵany úshin Anar Meshimbaevany kináli dep taýyp, ony 7 jylǵa jalpy rejımdegi kolonııada bas bostandyǵynan aıyrý jazasy taǵaıyndalsyn. Jekemenshik múlkin tárkileý jáne memlekettik qyzmetke ornalasýǵa 5 jylǵa deıin tyıym salý qarastyrylsyn», - dep sheshim shyǵardy Astana qalasy Esil aýdandyq sotynyń sýdıasy Aqmaral Isaeva.
A.Meshimbaevaǵa qatysty qozǵalǵan qylmystyq is 2010 jyldyń qańtar aıynda bastalǵan edi. Sol kezde ol Qazaqstannan ketip, izin sýytty. Arada tórt jyl ótkende Máskeýde quqyq qorǵaý qyzmetkerleriniń qolyna túsip, elge jetkizildi.
Derekkóz: «Qazaqstan» telearnasy.
Foto: Newskaz.ru.