Solardyń ishinde keıbir zańnamalyq aktilerge memlekettik qyzmet máseleleri boıynsha ózgerister men tolyqtyrýlar engizý týraly zań jobasy kóbirek talqylanyp, baıandama jasaǵan Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarovqa depýtattar birneshe suraq qoıdy.
Zań jobasynyń ózi Elbasynyń ústimizdegi jylǵy 14 maýsymda jáne Ulttyq komıssııanyń 15 sáýirde bergen tapsyrmalarynyń negizinde daıyndalǵan. Ol azamattardyń memlekettik qyzmetke túsý tártibin jetildirip, quqyq qorǵaý jáne memlekettik qyzmet standarttaryn jaqyndatady. Q.Qojamjarovtyń aıtýyna qaraǵanda, zań jobasy qoǵamda keńinen talqylanǵan.
Sonymen túzetýler qandaı degen suraqqa jaýap beretin bolsaq, onda birinshiden, memlekettik qyzmettiń bos oryndaryn tolyqtyrý qaıta qaralady. Qazirgi kezde ol úsh kezeńnen turatyn konkýrs arqyly júzege asyrylady. Oǵan 16-dan 52 kúnge deıin ýaqyt ketip, memlekettik qyzmet orny kóp merzimge bos turady. Osynyń ózi kadr tapshylyǵyna ákelýde, dedi sheshen. Ásirese, aýyldyq jáne aýdandyq deńgeılerde kadr jetispeýshiligi aıqyn baıqalýda eken. Zań jobasy osyndaı olqylyqtardy boldyrmas úshin ishki jáne jalpy konkýrstardy biriktirýdi kózdep otyr. Sóıtip, bos oryndardy tezirek tolyqtyrýǵa qol jetkiziledi, sonymen qatar merıtokratııa qaǵıdattary saqtalatyn bolady, dedi Q.Qojamjarov.
Sondaı-aq, «A» korpýsy qyzmetkerlerin «V» korpýsy laýazymdaryna taǵaıyndaý tártibi jeńildetiledi. Qazir «A» korpýsynyń qyzmetkerlerin tómengi oryndarǵa taǵaıyndaý tek kadr saıasaty jónindegi ulttyq komıssııanyń sheshimimen ǵana júzege asyrylsa, endi zań jobasy osy quqyqty agenttikke berýdi usynǵan.
Úshinshi basty ózgeris quqyq qorǵaý qyzmetine úmitker tulǵalarǵa arnalypty. Zań jobasy olardyń zańdardy bilý jáne jeke basynyń qasıetterin baǵalaýǵa arnalǵan testileýden ótý merzimin aýystyrýdy kózdegen. Qoldanystaǵy zańǵa sáıkes mundaı talap kelesi jyldyń birinshi qańtarynan bastap engiziletindigi belgilengen. Alaıda, Memleket basshysy bul júıeni bıyldan bastap engizý jóninde tapsyrma beripti. Mine, osy jáne basqa da ózgerister týraly baıandaǵan Q.Qojamjarovqa birinshi suraqty depýtat Amangeldi Dáýrenbaev qoıdy. Ol quqyq qorǵaý organdarynyń bos laýazymdaryna úmitker bolatyn tulǵalardy testileý úshin agenttikte tıisti baza bar ma jáne bul is bıýdjetten qosymsha qarajat talap etpeı me dep surady. Onyń suraǵyna jaýap bere kelip Q.Qojamjarov quqyq qorǵaý organdaryndaǵy bos oryndarǵa jylyna 37 myńdaı úmitker kelip, testileýden ótetinin jáne agenttiktiń bazasy osy isti atqarýǵa jetkilikti ekenin jetkizdi.
Depýtat Pavel Kazansev merıtokratııa qaǵıdatynyń saqtalýyna engiziletin ózgerister kedergi keltirmeı me dep surady. Oǵan Q.Qojamjarov konkýrstyq prosedýralardy ońtaılandyrý merıtokratııa qaǵıdattarynyń saqtalýyna kedergi keltirmeıtindigin kóldeneń tartty.
Depýtat Serik Seıdýmanov basshylyq laýazymdarǵa taǵaıyndalǵan tulǵalardyń komandasymen kelý máselesi halyq arasynda narazylyq týdyratynyn eske sala kelip, kareralyq modelge aýysqannan beri memlekettik basshy qyzmetkerlerdiń komandasymen oryn aýystyrýy azaıdy ma dep surady. Oǵan Q.Qojamjarov konkýrssyz taǵaıyndaýlardyń 25 ese azaıǵanyn aıta kelip, osynyń arqasynda birinshi basshylar arasynda komandasymen aýysyp júrý isi azaıyp kele jatqany baıqalatynyn jetkizdi.
Zań jobasy jóninde qosymsha baıandamany Halyqaralyq ister, qorǵanys jáne qaýipsizdik komıtetiniń múshesi Ersultan Bekturǵanov jasady. Shaǵyn talqylaýdan keıin zań jobasy tolyqtaı maquldandy.
Osy kúni TMD-ǵa qatysýshy memleketterdiń tótenshe oqıǵalardyń aldyn alý jáne joıý salasyndaǵy yntymaqtastyǵy týraly kelisimdi ratıfıkasııalaıtyn zań jobasy da maquldandy. Zań jobasy týraly baıandamany Ishki ister mınıstri Q.Qasymov jasady.
Al keıbir zańnamalyq aktilerge ekologııalyq máseleler boıynsha ózgerister men tolyqtyrýlar engizý týraly zań jobasy boıynsha qorytyndy ázirleýge ýaqyt belgilendi.
Jaqsybaı SAMRAT, «Egemen Qazaqstan»