Áleýeti barǵan saıyn artyp, búginde el ekonomıkasynyń lokomotıvine aınalyp kele jatqan Astananyń óndiristik qýatyn arttyrýda shaǵyn jáne orta bıznes sýbektileriniń úlesi zor. Bas qalamyzdyń qalyptasa bastaǵan alǵashqy kúninen orta kásipkerliktiń damýyna barynsha jaǵdaı jasalyp keledi. Osy rette Elbasy Nursultan Nazarbaevtyń Joldaýynda «Shaǵyn jáne orta bıznesti damytý – HHI ǵasyrdaǵy Qazaqstandy ındýstrııalyq jáne áleýmettik jańǵyrtýdyń basty quraly. Mundaǵy meniń ustanymym aıqyn ekenin bilesizder, ony talaı aıtqanmyn. Ekonomıkamyzda shaǵyn jáne orta bıznes úlesi artqan saıyn, Qazaqstannyń damýy da ornyqty bola túsedi», dep atap kórsetkenin erekshe basymdyqpen aıtýǵa bolady.
Elordada jeke kásibimen aınalysatyn azamattarǵa jan-jaqty jaǵdaı jasalýyna baılanysty olardyń qatary sońǵy kezde aıtarlyqtaı artyp keledi. 2014 jyldyń 1 qańtaryndaǵy derek boıynsha, qaladaǵy shaǵyn jáne orta sýbektiler sany 55,4 myń birlikti qurap otyr. Eger 2009 jyly Astanada tirkelgen 25,8 shaǵyn jáne orta bıznes sýbektilerinde 122,8 adam eńbek etse, qazir bul salada 189,3 myń adam eńbek etedi. Bul burnaǵy jylmen salystyrǵanda, 111,6 paıyzdy quraıdy.
О́tken jyly elordadaǵy shaǵyn jáne orta bıznes sýbektileri 1 185 779 mıllıon teńgeniń ónimin óndirip, qyzmetin kórsetti. Memleket basshysynyń shaǵyn jáne orta bıznes sýbektilerine qoldaý kórsetý jónindegi tapsyrmasy negizinde Astana qalasynyń ákimdigi orta kásipkerliktiń jumysyn damytý maqsatynda «Bıznestiń jol kartasy-2020» baǵdarlamasy aıasynda keshendi sharalardy is júzine asyryp keledi. Osy baǵdarlama negizinde jumys isteıtin Úılestirý keńesi ÚIID baǵdarlamasy aıasynda 109 jobany maquldady. Jalpy somasy 18 835,7 mıllıon teńge nesıemen qarjylandyrylatyn 106 joba boıynsha bank/lızıng kompanııalary nesıe stavkalaryna sýbsıdııa jasaıtyn boldy.
Orta kásipkerlikti damytý negizinde astanalyqtardy turaqty jumys ornymen qamtamasyz etý máselesi de sheshimin taýyp otyr. 2013 jyly elordada 17 787 jańa jumys orny ashylǵan bolsa, onyń 11 840-y shaǵyn jáne orta kásipkerlik sýbektileriniń negizinde qamtamasyz etildi. Qala bıýdjetiniń kiris bóligin tolyqtyrýda da orta kásipkerlik salasynan túsetin salyq mólsheri jyldan-jylǵa artyp keledi. Halyqaralyq sarapshylardyń reıtıngi boıynsha, Qazaqstan bıznesti júrgizýge eń qolaıly jaǵdaı jasalǵan elder qatarynan laıyqty ornyn alyp otyr. Al elimiz boıynsha orta kásipkerlikti damytý úrdisinde Astana qalasy óziniń kóshbasshylyq belsendiligin kórsetýde.
Jylqybaı JAǴYPARULY,
«Egemen Qazaqstan».