Qazaqstan halqy Assambleıasy Almaty oblysyndaǵy jappaı tóbeleske baılanysty pikir bildirdi, dep habarlaıdy Egemen.kz.
Búgin Qazaqstan halqy Assambleıasynyń resmı ókili Maııa Bekbaeva arnaıy málimdeme taratty.
«Qurmetti qazaqstandyqtar! Keshe kúndizgi ýaqytta Almaty oblysy Panfılov aýdany Penjim aýylynyń jergilikti mektebinde eki joǵary synyp túlekteriniń arasynda kelispeýshilik týyndap, oqýshylar arasynda tóbeleske ulasty. О́kinishke qaraı, tóbeles barysynda oqýshylardyń biri zardap shekti, oǵan qajetti kómek kórsetildi. Ol qazir aýrýhanada dárigerlerdiń baqylaýynda», dedi Assambleıanyń resmı ókili.
Onyń aıtýynsha, keshke aýylda jergilikti turǵyndar jınalyp, mektep aýmaǵynda bolǵan jappaı tóbeles saldarynan atalmysh jaǵdaıdyń oryn alýyna baılanysty narazylyq bildirgen. Sonymen qatar keıbir jasóspirimder men jastar emosııanyń jáne arandatýshylardyń áserinen birneshe jeke úı men kólikterdiń áınegin syndyrǵan.
«Aýyl turǵyndary arasynda, etnosaralyq negizde qandaı da bir janjaldyń, ásirese qaqtyǵystardyń joq ekendigin jáne oǵan jol berilmeıtindigin erekshe atap ótkim keledi.
Jergilikti turǵyndar - qazaqtar da, uıǵyrlar da kóp jyldar boıy birge turyp keledi, bir biriniń dostary men kórshileri. Onyń barlyǵy shyn júrekten beıbitshilik pen tynyshtyqty qalaıdy. Jergilikti atqarýshy jáne quqyq qorǵaý organdarynyń ókilderi, Qazaqstan halqy Assambleıasy Tóraǵasynyń Qoǵamdyq orynbasary Zákirjan Kúzıev, QHA hatshylyǵy jáne oblystyq ishki saıasat basqarmasynyń etnosaralyq qatynastar máseleleri jónindegi bóliminiń basshysy M.Batyrbekov jáne «Qoǵamdyq kelisim» KMM dırektory qoǵamdyq tártipti qamtamasyz etýde. Olarmen birge aqsaqaldar, jıgıt-beshı, azamattyq qoǵam ókilderi jumys isteıdi.
Qazirgi ýaqytta Penjim aýylyndaǵy jaǵdaı turaqty», dedi Qazaqstan halqy Assambleıasynyń resmı ókili Maııa Bekbaeva.