Búgin Nur-Sultan qalasyndaǵy «Barys Arenada» mánerlep syrǵanaýdan ekinshi Denis Ten Memorial Challenge halyqaralyq týrnıri bastaldy, dep habarlaıdy Egemen.kz.
Mádenıet jáne sport mınıstrligi, Ulttyq Olımpıada komıteti men Nur-Sultan qalasynyń ákimdiginiń qoldaýymen «Denıs Ten qory» qoǵamdyq qory uıymdastyryp jatqan jarys 31 qazanda máresine jetedi. Bıyl mánerlep syrǵanaýdan «Chellendjer» (ISU Challenger Series) sanatynda 7-shi jarys sanalatyn Denis Ten Memorial Challenge týrnırinde 16 elden kelgen 100-den astam sportshy baq synaıdy. Onyń ishinde bıylǵy álem chempıonatynyń júldegerleri, Beıjińde ótetin Olımpıadaǵa baratyn mánerlep syrǵanaýshylar bar.
Týrnırde baq synaıtyn qazaqstandyq sportyshylar: erler arasyndaǵy jekeleı synda – Rahat Bralın, Mıhaıl Shaıdorov, Dıas Jırenbaev. Áıelder arasynda – Anastasııa Lobanova, Bogdana Rakıshev men Iаsmına Tekık. Al juptyq synda el namysyn Gaýhar Naýryzova/Boıansangýr Datıev jáne Maksın Ýezerbı/Temirlan Erjanov juby qorǵaıdy.
Týrnırde Halyqaralyq konkıshiler odaǵynyń (ISU) joǵary sanatty 36 tóreshisi qyzmet etedi.