QR Premer-Mınıstri Asqar Mamınniń tapsyrmasy boıynsha QR Indýstrııa jáne ınfraqurylymdyq damý mınıstri Beıbit Atamqulov «Aýyl – el besigi» jobasynyń iske asyrylý barysymen tanysý úshin Shyǵys Qazaqstan oblysyna bardy, dep habarlaıdy Egemen.kz.
Mınıstr ulttyq joba aıasynda kúrdeli jóndeýden ótken Jarma aýdanynyń Áýezov kentindegi Baqyrshyq orta mektebine bardy. Bilim ordasynda edender, esikter, káriz júıesi, sý qubyry, jylý jáne elektr jelileri aýystyrylyp, syrtqy jáne ishki árleý jumystary júrgizilgen. Balalar búginde jańartylǵan zamanaýı kabınetterde bilim alýda.
Osy kentte QR IIDM basshysy Mádenıet úıi qurylysynyń barysymen tanysty. Nysandy paıdalanýǵa bergennen keıin turǵyndar ǵımarattaǵy 120 oryndyq kitaphana men 400 oryndyq kórermen zalyn paıdalana alady.
Sondaı-aq Beıbit Atamqulov «Taldyqorǵan-О́skemen» jáne «Qalbataý-Maıqapshaǵaı» avtojoldarynyń qaıta jańartylǵan ýchaskelerin qarap, jol boıyndaǵy qyzmet kórsetý nysandarynyń jumysymen tanysty.
Mınıstr Ulan aýdanynda salynyp jatqan qus fabrıkasyna bardy. Onda óndiris keńeıtilip, shyǵarylatyn daıyn ónim kólemi eki esege - jylyna 60 myń tonnaǵa deıin artady. 700-den astam turaqty jumys orny ashylady. Qus ósirýden bastap óńdeýge jáne konservileýge deıingi óndiris sıkli uıymdastyrylady.
Glýbokoe aýdanynda QR IIDM basshysy «Aýyl - el besigi» baǵdarlamasy aıasynda salynǵan tórt aýyldyń nysandarymen tanysty. Aýyldyq aýmaqtardy damytýdyń keshendi tásili boıynsha Shyǵys Qazaqstan oblysynyń oń tájirıbesi atap ótildi. Onda aýyldaǵy ómir sapasyn jaqsartý úshin birneshe memlekettik baǵdarlamanyń resýrstary shoǵyrlandyrylady.
Glýbokoe kentinde mınıstr 300 oryndyq kórermen zaly bar mádenıet úıine baryp, zamanaýı qural-jabdyqtarmen, horeografııa, mýzyka, sándik-qoldanbaly óner úıirmeleriniń jumysymen tanysty. Mádenıet úıi aldynda qazaqtyń uly aqyny, aǵartýshy Abaı Qunanbaevtyń músini ornatylǵan.
Sondaı-aq Beıbit Atamqulov 2018 jylǵy sý tasqynynan keıin apatty jaǵdaıda turǵan eski ótkeldiń ornyna jaqynda salynǵan Progress aýylyndaǵy kópirdi qarap shyqty.
Beloýsovka kenti men Tarhanka aýylyndaǵy jóndelgen kóshelerge bardy. Ol eldi mekenderde 8 shaqyrym jol jóndelip, jaryq tirekteri ornatyldy.
7 shaqyrymnan astam joly jóndelgen Kókpekti aýdany Samar aýylynyń kóshelerin qarady.
Bul eldi mekende «Aýyl – el besigi» jobasy aıasynda basseın salynyp jatyr. Búgingi tańda onda 80% jumystar oryndalǵan.
Sondaı-aq mınıstr Kúrshim aýdanyndaǵy Buqtyrma sý qoımasy arqyly ótetin kópir ótkeli salynatyn jerge bardy. Qazir nysanda daıyndyq jumystary júrgizilýde. О́ńir turǵyndary ótkeldi 2024 jyldan bastap paıdalana alady.
Shyǵys Qazaqstan oblysynda «Aýyl – el besigi» baǵdarlamasyn júzege asyrýdyń negizgi máseleleri oblys basshylyǵy, qalalar men aýdandar ákimderiniń qatysýymen ótken jumys keńesinde talqylandy. QR IIDM basshysy ShQO ákiminiń birinshi orynbasary Almashan Smatlaevpen birge aýyldy keshendi damytý jobalaryn qarastyrdy.