Qazaqstanda ótken qazan aıynda onyń aldyńǵy qyrkúıek aıymen salystyrǵanda azyq-túlik taýarlarynyń baǵasy – 0,7%, azyq-túlik emes taýarlarynyń baǵasy – 1%, aqyly qyzmetter quny 0,5% qymbattady, dep habarlaıdy Egemen.kz.
QR Strategııalyq josparlaý jáne reformalar agenttigi Ulttyq statıstıka bıýrosynyń málimetine sáıkes, baǵanyń ósýi jumyrtqaǵa – 7,2%, jańa jınalǵan kókónisterge – 5,5%, qumsheker men qus etine – 1,4%, kartopqa – 1,2%, nanǵa – 0,7%, pasterlengen sútke – 0,6%, aıranǵa, shoshqa etine, qaraqumyq jarmasyna – 0,5%, shujyq, makaron ónimderine jáne unǵa 0,4% tirkeldi. Al jańa jınalǵan jemister baǵasy kerisinshe, 1,5% arzandaǵan.
Baǵanyń qymbattaýy, sondaı-aq avtomobılderge – 3,4%, turmystyq taýarlarǵa – 1,1%, kıim jáne aıaq kıimge, farmasevtıkalyq ónimderge 0,4% baıqaldy. Jazǵy dızel otyny – 16,6%, ballondaǵy suıytylǵan gaz – 6,4%, aǵash – 2,6%, tas kómir – 2%, benzın 0,9% qymbattady.
Qoǵamdyq tamaqtandyrý jáne monsha qyzmetteriniń quny – 1%, densaýlyq saqtaý qyzmetteri – 0,5%, shashtarazdar men sulýlyq salondary qyzmetteri 0,4% artqan. Turǵyn úıdi jalǵa berý úshin tólem 1,1% ósti. Qalaaralyq avtobýspen jol júrý – 0,8%, taksımen jol júrý 0,6% qymbattady. Avıabıletter kerisinshe, 2,4% arzandady.
Turǵyn úı-kommýnaldyq qyzmetter salasynda tarıfter elektr energııasyna – 1,1%, ystyq sýǵa – 0,2% ósti, al ortalyqtan jylytý 0,4% tómendedi.