Kenshiler astanasynda kásiptik-tehnıkalyq kolledjderde oqıtyn stýdentter arasynda ótken jumysshy mamandyqtarynyń baıqaýynda 13 oqý ornynan 40-tan asa talapty jas baq synady.
«Durys tańdaý jasa» áleýmettik jobasy aıasyndaǵy atalǵan is-sharany uıymdastyrýshy Qaraǵandy Jastar resýrstyq ortalyǵynyń basshysy Symbat Áýbákirova baıqaýdy ótkizýdegi basty maqsat jumysshy mamandyqtarynyń bedelin arttyrý, jumysshy jastardy oqytý jáne qaıta daıarlaý boıynsha mamandyqty durys tańdaýdy, sonymen birge memlekettik baǵdarlamalardy nasıhattaý ekenin aıtady.
– «Durys tańdaý jasa» jobasyn «Qaraǵandy oblysynyń jumysshy jastar odaǵy» qoǵamdyq birlestigi memlekettik áleýmettik tapsyrys aıasynda júzege asyrýda. Jobanyń maqsatty toby – oqýshylar, kásiptik-tehnıkalyq kolledjderdiń stýdentteri, NEET sanatyndaǵy jastar, – deıdi S.Áýbákirova.
«Dánekerleý isi», «Ǵımarattar men qurylystardy salý jáne paıdalaný», «Tamaqtandyrýdy uıymdastyrý», «Shashtaraz-stılıst» jáne «Shashtaraz-modeler» mamandyqtary boıynsha saıysqan úmitkerlerdiń ónerine quramyna qyzmettiń joǵaryda atalǵan túrleriniń kásipqoılary, qalalyq máslıhat depýtattary, sybaılas jemqorlyqqa qarsy is-qımyl jónindegi oblystyq arnaıy monıtorıngtik toptyń músheleri jáne ÚEU ókilderi engen komıssııa tórelik jasady.
Baıqaý qorytyndysynda Qaraǵandy tehnıka-qurylys kolledjiniń stýdenti Dáýrenbek Sovet «Ǵımarattar men qurylystardy salý jáne paıdalaný» mamandyǵy boıynsha, Qaraǵandy ındýstrıaldy-tehnologııalyq kolledjiniń stýdenti Dalır Sýfankýlov «Tamaqtandyrýdy uıymdastyrý» mamandyǵy, Qaraǵandy taý-ken ındýstrııalyq kolledjiniń stýdenti Asyljan Zeınelkobden «Dánekerleý isi» mamandyǵy, Qaraǵandy tehnologııa jáne servıs kolledjiniń stýdenti Aleksandra Erohına «Shashtaraz-stılıst» mamandyǵy jáne Qaraǵandy kásiptik-tehnıkalyq kolledjiniń stýdenti Anastasııa Jmaılova «Shashtaraz-modeler» mamandyǵy boıynsha jeńimpaz bolyp tanyldy.
Úzdik atanǵan stýdentter sertıfıkattarmen, dıplomdarmen jáne estelik syılyqtarmen marapattaldy.