Ankara qalasynda Qazaqstan Respýblıkasynyń Tuńǵysh Prezıdenti – Elbasy kitaphanasy delegasııasynyń TÚRKSOI Bas hatshysy Dúısen Qaseıinovpen kezdesýi ótti, dep habarlaıdy Egemen.kz.
Elbasy kitaphanasynyń basshysy Baqytjan Temirbolat kezdesý barysynda TÚRKSOI-dyń túrki halyqtary arasyndaǵy baýyrlastyq pen dostyqty nyǵaıtýǵa baǵyttalǵan aýqymdy qyzmeti aıasynda birlesken yntymaqtastyqtyń keń aýqymdy perspektıvalaryna jol ashatyndyǵyn atap ótti.
Eske sala keteıik, osy jyldyń 17 naýryzynda Elbasy kitaphanasy men TÚRKSOI (Túrki mádenıetiniń halyqaralyq uıymy) arasynda yntymaqtastyq týraly Memorandýmǵa qol qoıylǵan bolatyn. Qujattyń maqsaty – túrki mádenıetiniń qalyptasý men damý tarıhyn zerdeleý boıynsha birlesken mádenı-bilim berý jáne ǵylymı-zertteý jobalaryn iske asyrý. Taraptar ǵylymı, bilim berý, shyǵarmashylyq jobalar men baǵdarlamalar, kórmeler, forýmdar, konferensııalar jáne basqa da qoǵamdyq mańyzy bar is-sharalar ótkizýdi josparlaıdy.
Sondaı-aq Elbasy kitaphanasynyń ókilderi Ankara qalasyndaǵy Atatúrik memorıalyna bardy.
Qazaqstan Respýblıkasy Táýelsizdiginiń 30 jyldyǵyna jáne Qazaqstan men Túrkııa arasyndaǵy dıplomatııalyq qatynastardyń ornaǵanyna 30 jyl tolýyna arnalǵan is-sharalar aıasynda Elbasy kitaphanasy Elbasy Akademııasymen birlesip, Qazaqstan Respýblıkasynyń Túrkııa Respýblıkasyndaǵy Elshiliginiń jáne Túrkııa Respýblıkasy Prezıdenti Ákimshiliginiń qoldaýymen Ankara qalasyndaǵy Túrkııa Prezıdenti Ákimshiligi janyndaǵy Ulttyq kitaphanada «Qazaqstan joly. Túrki birligi» kórmesin ashty.
Osy kúni Qazaqstan men Túrkııanyń kórnekti saıası jáne qoǵam qaıratkerleriniń qatysýymen «Túrki álemi: tarıh, qazirgi zaman, bolashaq» halyqaralyq konferensııasy ótti. Is-shara aıasynda Elbasy kitaphanasy Túrkııa Prezıdenti Ákimshiligi janyndaǵy Ulttyq kitaphanamen jáne Túrkitildes memleketterdiń yntymaqtastyq keńesimen memorandýmdarǵa qol qoıyldy.