Qyryq tórtinshi qarsylas

Rıota Mýrata degen kim?

Japonııanyń Nara qalasynda 1986 jyly dúnıege kelgen Mýrata áýesqoı bokstan 2011 jyl­ǵy álem birinshiliginiń kúmis júl­de­geri, 2012 jylǵy London Olım­pıa­dasynyń chempıony bolsa da, óz elindegi asa tanymal sportshynyń biri dep aıtý qıyn. О́ıtkeni sýmo sportynyń dańqy aspandap turǵan elde basqa sport ókiliniń áıgili bola qoıýy qıyn. Dese de ol boks boıynsha Japonııadaǵy eń ataqty bylǵary qolǵap sheberi sanalady. Tipti onyń burynǵy qarsylasy Rob Brant (AQSh) Mýratany «Japonııalyq Lebron Djeıms» dep ataǵan. «Japonııada bolǵan jekpe-jegimizdiń aldyn­daǵy baspasóz konferensııasyna meniń keıbir jekpe-jekterimdegi sııaq­ty Rıotany kórý úshin kóp­tegen jankúıer keldi», deıdi ol.

Alty jasynda boks qolǵabyn qolyna kıgen Mýrata 2004 jyldan bastap iri jetistikterge qol jet­kize bastady. Sol jyly ýnıver­sıtet­tiń birinshi kýrsynda oqyp júr­geninde Japonııa chempıony ata­nyp, 2005 jyly Hoshımınde ótken Azııa chempıonatynda qola júldege qol jetkizdi. Al 2006 jyly Qatar astanasy – Dohada ót­ken jazǵy Azııa oıyndarynyń bas­tapqy básekesinde Afına Olımpıadasynyń chempıony, otanda­symyz Baqtııar Artaevqa tap kelip, 24:5 esebimen ońbaı jeńil­geni esimizde. Sodan keıin Rıota qatarynan tórt jyl (2007, 2009, 2010 jáne 2011) Japonııa birin­shiliginde qarsylas shaq keltir­gen joq.

2008 jyly Olımpııa oıyndaryna qatysýǵa bel býǵan ol alǵash Bangkoktaǵy irikteý týrnırine qatysyp, jartylaı fınalǵa deıin jetti. Fınalǵa joldama beretin básekede ózbekstandyq Elshod Ra­sýlovtan jeńilip, jarysty qo­la júldemen túıindedi. Biraq ol bul nátıjemen joldamaǵa qol jetkize almady. Astanada ótken ekinshi irikteý kezeńi de Rıota úshin sátsiz aıaqtaldy. Shırek fınalda Homaıon Amırıden utylǵan Mýrata jarysty nebári jetinshi orynmen qorytyndylady. Osy bir sátsizdikten keıin japonııalyq boksshy qolǵabyn shegege ilýdi jón kórip, ózi oqyǵan ýnıversıtette stýdentterge dáris berip, boks klýbynda jattyqtyrýshy bolyp jumys istedi. Alaıda arada bir jarym jyl ótkende karerasyn qaıta bastaǵan Mýratanyń ekinshi tynysy ashylyp, aıtarlyqtaı jetistikterge qol jetkize bastady.

Karerasyn qaıta jalǵaǵannan keıingi Mýratanyń alǵashqy iri jarysy 2010 jyly Astanada ót­ken Prezıdent kýbogy boldy. О́ki­nishke qaraı, onyń elimiz­ge jasaǵan ekinshi sapary da ná­tıjesiz aıaqtaldy. Alǵashqy ke­zeń­de grýzııalyq Levan Gýleda­nıdi jarys jolynan yǵystyr­ǵanymen, shırek fınalda jerlesimiz Dana­bek Sýjanovtan aılasyn asyra almady.

Mýratanyń juldyzy 2011 jyly Bakýdegi (Ázerbaıjan) álem chempıonatynda jandy. Ja­handyq dodanyń birinshi aına­lymynda ol eki dúrkin álem chem­pıony ózbekstandyq Abbos Atoevty tehnıkalyq nokaýtpen jeńse, keıingi kezeńderde ırandyq Mohamed Sattarpýrdy, germanııalyq Shtefan Harteldi eline qaıtardy. Osydan keıin ol shırek fınalda ırlandııalyq Dar­ren O’Nıldi, jartylaı fınal­da brazılııalyq Eskıva Falkan­dy jeńdi. Fınalda ýkraınalyq Evgenıı Hıtrovtyń osal tusyn taba almaı, alǵashqy álem birin­shiligin kúmis júldemen aıaqtady.

Araǵa bir jyl salyp Rıota 2012 jyly London Olımpıadasynda atoı saldy. Irikteý kezeńderinde Aljır jáne Túrkııa ókilderinen basym tússe, jartylaı fınal men fınalda ejelgi qarsylastary Abbos Atoev pen Eskıva Falkandy bir upaı aıyrmashylyǵymen jeńip, Olımp shyńynyń tórinen kórindi. Osylaısha, Mýrata Japo­nııaǵa 48 jyldan keıin alǵash ret Olımpıadanyń altynyn syılady. Londondaǵy tabysty ónerinen keıin ol kásipqoı bokstaǵy qyraǵy pro­moýterlerdiń kózine túsip, 2013 jyldan bastap birjola kásip­qoılar arasynda baq synaýǵa bel býdy.

Áıgili Bob Arým basqaratyn Top Rank Promotions kompanııa­symen kelisimshart jasaǵan ja­ponııalyq boksshy segiz jyldan beri 18 jekpe-jek ótkizip, 16-synda jeńiske jetti. 13 qar­sy­­lasyn nokaýtqa jiberdi. Eki aı­­qasynda qarsylasyna ese ji­berdi. 2017 jyly Hassan N’Dam N’Jıkamnan jeńilse, 2018 jyly Rob Branttan utyldy. Biraq eki re­vansh kezdesýinde de Mýrata esesin qaıtardy. Hassan N’Dam N’Jı­kammen bolǵan ekinshi jekpe-jeginde Rıota jetinshi raýndta tehnıkalyq nokaýtpen jeńiske jetip, WBA nusqasy boıynsha álem chempıony beldigine ıelik etti. Keıin ol ıtalııalyq Emanýele Blandamýra, amerıkalyq Rob Brant jáne kanadalyq Stıven Batler syndy bylǵary qolǵap sheberlerimen qolǵap túıistirip, álem chempıony ataǵyn sátti qorǵady.

 Úshinshi boksshynyń úmiti

Joǵaryda aıtyp ótkeni­mizdeı, Mýrata – Golovkınniń kare­rasyndaǵy úshinshi japonııa­lyq boks­shy. Otandasymyzdyń Kún­shyǵys eliniń boksshylarymen tanystyǵy sonaý 2012 jyly bas­taldy. Sol jyly Ýkraınanyń Brovary qalasynda ótken boks keshiniń anderkardynda Gennadıı Makoto Fýtıgamımen (19-6) qol­ǵap túıistirip, ózine tıesili orta salmaqtaǵy WBA beldigin tórtinshi márte, al IBO chempıondyq ata­ǵyn birinshi ret qorǵady. 12 raýnd­qa josparlanǵan jekpe-jek úshin­shi raýndta otandasymyzdyń tehnı­kalyq jeńisimen aıaqtaldy.

Osy kezdesýden keıin Golovkın ataqty amerıkalyq HBO telearnasymen kelisimshartqa otyryp, iri jekpe-jekter ótkize bas­tady. Otandasymyz 2013 jyly bes jekpe-jek ótkizýdi maqsat etip, qar­sylasynyń ataq-dańqyna qaramaı kez kelgen boksshymen sharshy alańda kezdesýge daıyn ekenin málimdedi. Biraq ataqty boks­shylar Gennadıımen aıqas ótkizýden bas tarta bastady. Sóı­tip júrgende japonııalyq No­býhıro Isıda otandasymyzben judyryqtasýǵa kelisimin berdi. 2013 jyly 30 naýryzda Gennadıı Golovkın Monakoda japon boks­shysymen kezdesti. Raýndtyń al­ǵashqy sekýndtarynan bastap alǵa umtylǵan Golovkın bul joly da qarsylasyn úshinshi raýndta tize búktirdi. Bir aıta keterligi, Isıda buǵan deıingi birde-bir aı­qa­synda qarsylastarynan merzi­minen buryn jeńilmegen edi.

Japonııalyq boksshylarmen úsh raýndtan artyq judy­ryq­tas­paıtyn Golovkınge Mýrata neshe raýnd shydar eken? Bul suraq­tyń jaýaby 29 jeltoqsanda Saı­tama qalasyndaǵy Saitama Super Arena sport kesheninde ótetin boks keshinde belgili bolmaq.