Fýtboldan álem chempıonatynyń irikteý kezeńindegi sońǵy oıynda Fransııadan iri eseppen jeńilip, janarymen jer shuqyp qaıtqan Qazaqstan ulttyq quramasynyń fýtbolshylary keshe joldastyq matchta Tájikstandy áreń jeńdi. Azııa qurlyǵyndaǵy orta deńgeıdegi quramanyń qaqpasyna óz jerimizde bir ǵana gol soǵýǵa shamamyz jetti.
Ol goldyń ózin Tájikstan quramasynyń bizge jasaǵan «syılyǵy» dep te qabyldaýǵa bolatyn shyǵar. О́ıtkeni matchtyń 12-mınýtynda qonaqtardyń qaqpashysy Shohrýh Kırgızboev áriptesine pas berý kezinde qatelesip, baıqaýsyzda dopty Baqtıer Zaınýtdınovtiń aıaǵyna salyp berdi. Reseı birinshiliginde óner kórsetetin jartylaı qorǵaýshymyz bos qaqpany dál kózdep, oıyndaǵy jalǵyz ári jeńis golyn soqty. Budan keıin Zaınýtdınovte gol soǵatyn taǵy bir-eki múmkindik boldy. Alaıda onyń tepken doptary qaqpa torynan tabylmady. Birde qaqpa baǵany iske kirisse, keıingisinde oıynǵa tóreshi aralasty. Iаǵnı 60-mınýtta Tájikstan qaqpasynyń mańynda Zaınýtdınovke qarsy oıyn tártibi buzylǵanymen, Belarýsten kelgen bas tóreshi Amın Kýrghelı 11 metrlik aıyp dobyn belgilemedi. Qalǵan ýaqytta Qazaqstan quramasynyń fýtbolshylary birde-bir qaýipti shabýylmen kózge túse almady. Jerlesterimiz esepte alda bolǵanymen, oıyn belgili bir ólshemmen qaraǵanda Tájikstan quramasynyń basymdyǵymen ótkendeı áser qaldyrdy.
Birinshi taımnyń statıstıkasyna súıensek, dopqa ıelik etý boıynsha Tájikstan fýtbolshylary alda boldy – 52 paıyz. Sonymen qatar bizdiń qaqpamyzǵa jeti márte soqqy jasady. Al Talǵat Baısýfınov shákirtteri alǵashqy 45 mınýtta dopty ózderinde 48 paıyz ustap, qarsylastarynyń qaqpasyna nebári bes soqqy jasaǵan.
Ekinshi taımda da Tájikstan quramasy belsendilik boıynsha bizdiń fýtbolshylardyń aldyn orap ketti. Bul joly olar dopqa 58 paıyz ıelik etti. Úsh márte Igor Shaskıı qorǵaǵan qaqpaǵa gol soǵýǵa tyrysyp kórgenimen, bul oıynda olarǵa gol soǵý baqyty buıyrmady. Osylaısha, bul oıyn Qazaqstan quramasy úshin óte qıynǵa soqty.
Qysqasy, jeńis jankúıerlerge asa bir qýanysh syılaı qoıǵan joq. «Fransııamen bolǵan oıynda negizgi quramnyń 8 fýtbolshysy túrli sebeppen Parıjge bara almady. Sondyqtan qosalqy quram oıynshylarymen oınap, iri eseppen jeńilýge májbúr boldyq», degendi alǵa tartqan bas bapker de, Federasııa basshylyǵy da endi ne dep aqtalar eken? О́ıtkeni álem birinshiliginiń irikteý kezeńindegi sońǵy oıynǵa qatysa almaǵan segiz fýtbolshynyń birazy keshegi oıynda birinshi mınýttan bastap alańǵa shyqty. Áıtkenmen eshqaısysy jarytyp oınaı almady. Fransııadaǵy masqaradan keıin namysy bar jigitter óz qatelikterin jýyp-shaıyp, jankúıerlerdiń betin beri qaratý úshin alańda jan berip, jan alysýy kerek edi. Joq, bizdiń jigitter quddy 10:0 esebimen jeńip jatqan sııaqty, meılinshe qaqpaǵa gol ótkizip almaýdyń bar amalyn qarastyrdy.
Qazaqstan men Tájikstan quramalary búginge deıin jasyl alańda bes ret jolyǵyp, tórt kezdesýde jerlesterimizdiń mereıi ústem boldy. Bir oıynda eki eldiń kúshteri teń tústi. Qazaqstan Azııa qurlyǵynda júrgende Tájikstanmen bir oıyn ótkizse, ÝEFA-ǵa múshe bolǵannan keıin tórt márte kezdesti. Eki eldiń eń alǵashqy oıyny 1994 jyly О́zbekstannyń táýelsiz kýbogy týrnırinde ótip, Qazaqstan 1:0 nátıjesimen jeńiske jetti. 2006 jylǵy Almatydaǵy joldastyq matchta jerlesterimiz 4:1 esebimen basym tússe, 2007 jyly 1:1 nátıjesimen teń oınady. Al 2014 jyly – 2:1, 2021 jyly 1:0 esebimen utty. Barlyq matchty óz alańymyzda ótkize tura, tájikterdi keıingi eki oıynda tek bir dop aıyrmashylyǵymen ǵana jeńippiz. Osydan-aq qaı eldiń fýtboly qaı deńgeıde ekenin ańǵarýǵa bolady. Sońǵy match Nur-Sultanda emes, Dýshanbede ótkende tablodaǵy kórsetkish múlde basqasha bolar ma edi, kim bilsin?!