Ekpe egýdiń ekinshi kezeńi bastaldy

Qaladaǵy №1 otbasylyq den­saý­lyq ortalyǵyna birinshi kún­i Comirnaty vaksına­sy­nyń birinshi jáne ekinshi kom­po­nentiniń 60 dozasy jet­kizil­gen bolatyn. Onyń bir qu­ty­sy alty adamǵa arnalǵan. Medı­sı­na­lyq mekeme barlyq qajetti stasıonarlyq jáne jyljymaly tońazytqysh quraldarymen jab­dyqtalǵan jáne olar mek­tep­terge baryp jumysqa kiri­sýge daıyn. Atalǵan medı­sı­na­lyq mekemeniń dırektory Tatıana Bashırova alǵashqy me­dı­sınalyq-sanıtarlyq kómek kórsetý ortalyǵyna 82 myńnan astam adam tirkelgenin, onyń ishin­de 4 500 jasóspirim jáne 500-den astam júkti áıel bar ekenin aıtady.

– Vak­sınalaý pýnkti­ maý­­­sym-shilde aılarynda ha­lyq­ty bel­sen­di ımmýndaý ke­ze­ńin­de kúnine 500 adamǵa deıin qyzmet kórsetti. Bizde bul úshin qajettiniń bári bar. Men ata-analardy vaksına alý týraly aqparatty muqııat qarap, durys tańdaý jasaýǵa shaqyramyn. Bul vaksına AQSh, Kanada, Fransııa, Germanııa, Belgııa, Armenııa jáne basqa elderde balalardy ımmýndaý úshin belsendi qoldanylady. Jalpy, vaksınalaý bizdi aýrýdan qorǵaýǵa kómektesedi, – deıdi mekeme basshysy.

Qaraǵandydaǵy vaksınalaý beketteri qala emhanalary men otba­sylyq densaýlyq orta­lyq­tarynda belsendi jumy­syn qaıta bastady, sondaı-aq olar mektepterde de ornalastyrylatyn bolady. Ekpeni alǵash alǵan jastardyń ishinde Qaraǵandy mashına jasaý kolledjiniń úshinshi kýrs stýdenti Aleksandr Marıahın de boldy. On jetidegi óren nelikten vaksına alýǵa she­shim qabyldaǵany jaıly bylaısha aıtyp berdi:

– Baqytymyzǵa oraı, meniń jaqyndarymnyń eshqaısysy koro­navırýs ınfeksııasymen aýyr­mady. Bizdiń otbasymyzda bári egildi. Men ózimdi jáne týys­tarymdy qorǵaý úshin vak­sına alýǵa sheshim qabyl­da­dym, óıtkeni eshkim aýrýdan saq­tandyrylmaǵan. Meniń qur­das­tarym ımmýndaýǵa bas­qasha qa­raıdy. Biraq meniń oıymsha, vaksınalaý qazir qajet.

Sondaı-aq 17 jastaǵy­ Danııl Kovalchýktyń anasy Natalıa da tek ımmýndaý arqy­ly aýrýdy jeńýge nemese kem de­gen­de onyń aǵymyn jeńil­de­tý­ge bolatynyn nyq senimmen aıtady.

– Meniń ulym sportshy, bas­ke­t­bolmen aınalysady. Pan­­demııaǵa baılanysty ol ja­rys­tarǵa barýyn toqtatty. Biz bárimiz betperde men shekteýlerden sharshadyq. Qalypty ómirge oralǵymyz keledi. Ulym ózi vaksına alýǵa bel býdy, óıtkeni onyń kóz aldynda týǵan tátesi eki ret koronavırýspen aýyr­dy. Men ony qoldaımyn, óıt­keni bul vaksına zerttelgen, DDU maquldaǵan, – dedi Natalıa.

Resmı málimetke saı, Pfizer/BioNTech-Comirnaty jańa vak­sı­nasyn alǵashqy kúni 31 jas­ós­pirim men bala emizetin 10 áıel aldy.

QARAǴANDY