IýNISEF–tiń Qazaqstandaǵy ókili Artýr van Dızen jáne BUU-nyń Qazaqstan Respýblıkasyndaǵy Turaqty úılestirýshisi Mıkaela Frıberg-Storı Túrkistan qalasyndaǵy birqatar medısınalyq mekemede olardyń qyzmetimen jáne IýNISEF jobalaryn qala men óńirde engizý nátıjelerimen tanysý maqsatynda bardy, dep jazady Egemen.kz.
Sapar baǵdarlamasyna Túrkistan oblysy ákiminiń orynbasyry Rashıd Aıýpovmen resmı kezdesip, qalalyq emhanaǵa, balalar aýrýhanasyna jáne balalar jasyndaǵy aýrýlardy biriktirip qaraý jónindegi resýrstyq ortalyqty aralady.
«Biz Túrkistan oblysymen bilim berý jáne densaýlyq saqtaý salasynda kópten beri yntymaqtasyp kelemiz. 2019 jyly IýNISEF Túrkistan oblysyna júkti áıelder men erte jastaǵy balalarǵa patronajdyq qyzmet kórsetýdiń ámbebap progressıvti modelin ázirleý men engizýde qoldaý kórsetti. Osy baǵdarlamanyń arqasynda bes jasqa deıingi balalary bar analar men otbasylarǵa kútimdi jaqsartý úshin patronajdyq medbıkeler men áleýmettik qyzmetkerlerdiń múmkindikteri keńeıtildi. Men búgin baǵdarlamanyń sapaly jumys istep, otbasylarǵa kómektesetinine jeke kóz jetkize alǵanyma óte qýanyshtymyn», dedi Qazaqstandaǵy IýNISEF ókili Artýr van Dızen.
Bilim berý salasynda IýNISEF memlekettik jáne halyqaralyq áriptestermen birlesip, GIGA-nyń aýyl mektepterin ınternetke qosý jónindegi jahandyq bastamasyn iske asyrýda. Dúısenbide IýNISEF delegasııasy bastamaǵa qatysatyn Túrkistan oblysynyń bes mektebinde boldy. Aıdyń sońyna deıin oblystaǵy 38 mektepten jıyrma myńǵa jýyq oqýshy ınternetke qol jetkizedi.
«COVID-19 indetiniń nátıjesindegi qazirgi jaǵdaı bizge balalar men olardyń qaýymdastyqtary úshin ınklıýzıvti baılanys, onlaın oqytý jáne basqa da bastamalardyń jáne ekonomıkany yntalandyrýdyń mańyzdylyǵyn kórsetti. GIGA bastamasy arqyly biz eshkimdi qaldyrmaı eń osal balalar men qaýymdastyqtarǵa qol jetkizýimiz kerek. Sandyq teńsizdikti joıý jahandyq yntymaqtastyqty, kóshbasshylyqty jáne qarjy men tehnologııadaǵy ınnovasııany qajet etedi», dedi BUU-nyń Qazaqstan Respýblıkasyndaǵy turaqty úılestirýshisi Mıkaela Frıberg-Storı.