Keshe, 27 aqpan kúni Qyzylorda oblysynyń prokýratýrasynda oblys prokýrory Saparbek Nurpeıisovtiń tóraǵalyǵymen alqa májilisi ótkizildi. Onda aýlaýǵa tyıym salynǵan kıikti qorǵaýǵa baǵyttalǵan sharalar jáne brokonerlik qylmystarmen kúresý, onyń aldyn alý barysynda atqarylyp jatqan jumystar máselesi qaraldy. Bul týraly oblystyq prokýratýranyń baspasóz qyzmeti habarlady.
Qazaqstan Respýblıkasy Úkimetiniń 2012 jylǵy 25 shildedegi №969 qaýlysynyń 1-tarmaǵymen ǵylymı maqsattarda paıdalanýdan basqa, respýblıkanyń búkil aýmaǵynda kıikterdi, olardyń bólikteri men derıvattaryn paıdalanýǵa 2020 jylǵa deıin tyıym salynǵan. Sonda da bolsa, memleket tarapynan qoldanylyp jatqan sharalarǵa qaramastan, aýlaýǵa arnaıy tyıym salynǵan kıikterdi zańsyz aýlaý, brakonerlik faktileri jyldan-jylǵa kóbeıýde. Buǵan 2013 jyly brakonerlik faktileriniń 2012 jylmen salystyrǵanda 2 esege kóbeıgeni aıǵaq bolady.
Jalpy, 2012 jyly oblys kóleminde kıikterdi zańsyz aýlaýdyń 9 faktisi tirkelse, onda 59 bas kıik zańsyz aýlanyp, osy boıynsha qorshaǵan ortaǵa 15 mln. 977 myń teńgeniń zalaly kelgen. Atalǵan zalaldyń tek 1 mln. 496 myń teńgesi ǵana óndirilip, zalaldyń óndirilý kórsetkishi nebári 10 paıyzdy ǵana qurap otyr. Al 2013 jyly oblys boıynsha 22 fakti boıynsha 44 bas kıik zańsyz aýlanyp, 250 dana kıik múıizi aınalymnan alynǵan. 2014 jyldyń tek qańtar aıynyń ózinde ǵana osyndaı 10 faktiniń saldarynan 35 bas kıik ysyrapqa ushyraǵan. Osy arqyly qorshaǵan ortaǵa 3 mln. 518 myń teńge zalal kelgen.
2013 jyly brakonerlikpen aınalysqan tulǵalarǵa qatysty Qylmystyq kodekstiń 290-baby boıynsha 22 qylmystyq is qozǵalyp, 18 qylmystyq is sotqa joldandy. Mysaly, 2013 jyly Aral aýdandyq prokýratýrasynyń uıymdastyrýymen júrgizilgen reıdtik tekserý barysynda, «Honda» markaly motokóligi ustalǵan.
Tekserý júrgizý barysynda, qapqa salynǵan 1 bas kıik ańy, 6 dana kıik ańynyń múıizi, 1 dana qoldan jasalǵan pyshaq, 1 dana qolarasy aıǵaq zat retinde tárkilenip alynǵan. Oryn alǵan fakti boıynsha aýdan prokýratýrasy sezikti retinde ustalǵan N.J.-ǵa qarsy qylmystyq is qozǵalyp, aýdandyq sottyń úkimimen 3 jylǵa bas bostandyǵyn shekteý jazasyna sotty boldy.
Alqa sheshimimen joǵarydaǵylardyń negizinde kıikterdiń ósip-ónýin saqtap qalý, brakonerlikke qarsy kúres pen onyń aldyn-alý, tosqaýyl qoıý, áshkereleý jáne osy baǵytta quqyq buzýshylyqtyń profılaktıkasyn júrgizý maqsatynda árbir memlekettik organdarǵa atqarylatyn sharalar belgilenip berý usynyldy.
Qurysh Nurymbet.
Derekkóz: Qyzylorda oblystyq prokýratýrasynyń baspasóz qyzmeti.