OKQ alańynda ótken brıfıngte Tótenshe jaǵdaılar vıse-mınıstri Mereke Pishembaev gazben jabdyqtaý salasyndaǵy kemshilikter baryn aıtty, dep jazady Egemen.kz.
«Búgingi kúni ákimdikterdiń aqparaty men Bas prokýratýranyń saıtynda ornalastyrylatyn málimetterge sáıkes Nur-Sultan, Almaty, Shymkent qalalarynyń ákimdikterin qospaǵanda, JAO gaz jáne gazben jabdyqtaý salasyndaǵy memlekettik baqylaýdy jetkiliksiz deńgeıde júzege asyrady. Sondaı-aq Kásipkerlik kodekste kózdelgen tekserý is-sharalary josparlanbaıdy jáne júrgizilmeıdi», dedi ol.
Onyń sózinshe, birqatar ákimdik, sonyń ishinde Aqmola, Almaty, Atyraý, Qaraǵandy, Pavlodar, Soltústik Qazaqstan oblystary gaz jáne gazben jabdyqtaý salasynda memlekettik baqylaýdy júzege asyrý kezinde uıymdastyrýshylyq problemalardyń bolýyn, shtat birlikteriniń jetispeýshiligin jáne qosymsha bilim berý múmkindiginiń bolmaýyn atap ótken.
«Jergilikti organnyń birqatarynda aýdandyq ákimdikter deńgeıinde gaz jáne gazben jabdyqtaý salasynda memlekettik baqylaýdy júzege asyrý úshin búgingi kúnge deıin tıisti bólimsheler qurylmaǵan», dep aıtty TJM ókili Mereke Pishembaev.