«Sanasy joǵary adamdar ıdeıa talqylaıdy, sanasy orta adamdar oqıǵalardy talqylaıdy, sanasy tómen adamdar adamdardy talqylaıdy» deımiz. Elimniń taǵdyry – meniń de taǵdyrym dep biletin barlyq qazaqstandyq patrıottar sekildi men de jan-jaǵymdaǵy bolyp jatqan jaıttarǵa beıjaı qaraı almaımyn. Oıymdy aıtyp, kózqarasymdy bildirip júremin. Qoǵamda qansha adam bolsa, sonsha pikir bolady. Osy turǵydan alǵanda, men úshin Qazaqstan Respýblıkasynyń Tuńǵysh Prezıdenti – Elbasynyń orny qashanda bólek.
Táýelsizdiktiń bastapqy jyldaryndaǵy elimizdiń aýyr jaǵdaıyn bárimiz basymyzdan keshtik. Joqshylyq pen tapshylyqtan taryǵyp, tirshiligi toqtap, údere kóshken aýyl jurtynan qalmaı, qalaǵa aǵyldyq. Áldekimderdiń shamasy iri ortalyqtarǵa qonys aýdarýǵa jetti. Joq-juqanalar elsiz, egesiz shaǵyn qalashyqtardy panalap, ony qarbalasqa toly úlken aýylǵa aınaldyrdy.
Áli kúnge esime alsam, tóbe shashym tik turyp, quıqam shymyrlaı jóneledi. Qalaı kún kórdik? Ne jaryq joq. Ne jylý joq. Ne sý joq. Ne jalaqy joq. Balkondarymyzǵa qoıǵan peshterimizge eski-qusqy aıaqkıimdi jaǵyp, as-aýqat pisirgen kúnder umytylar ma. Sóıtip júrip aıaqtaryn apyl-tapyl basqan egiz ulymnyń sońynan dúnıege taǵy náreste keldi. Balabaqshalar jabylyp qalǵan. Emizýli bóbegimizdi kóterip júrip te jumystan qol úzbedik. Aılap, jyldap alynbaǵan aılyqtan kúder úzip, mektepti tastap, muǵalim qurbylarym qusap qap arqalap, Qarataý men Aqmola, Novosibir arasyn jol qylyp, aralap ketpesem de, naryqtyq ekonomıka óz degenine kóndirgen.
Degenmen, eleń-alań zaman óz zańyna baǵyndyrsa da, ilgergi úmitten kóz jazǵyzǵan joq. О́ıtkeni men de qalyń kópshilik sekildi memleketimizdi bastap alyp kele jatqan basshymyzǵa sendim. Táýekelge basyn tikken Nursultan Nazarbaevtyń ornynda basqa bireý bolǵanda memleketimizdiń hali qandaı bolatynyn kóz aldyma elestete almaımyn. О́ıtkeni birde qatty aıtyp, birde jumsartyp, birde arqadan qaǵyp, birde qamshylap otyryp, halqyn ekonomıkalyq tyǵyryqtan aman-esen alyp shyǵyp, endi ǵana aıaǵyna turǵan sábıdeı áljýaz jas memleketin ydyraý men quldyraýdan aman saqtap qalǵan Nursultan Ábishulynyń ólsheýsiz eńbegin áste joqqa shyǵarýǵa bolmaıdy. Kemeńger kóshbasshy memleketimizdi aýyr synaqtan súrindirmeı ótkizip, jahandyq syn-qaterler týǵyzyp jatqan álemdik tártiptiń turaqsyzdyǵynan zardap shektirmeýge meılinshe tyrysyp, damýdyń qazaqstandyq jolyn salyp bergen adam. Altaı men Atyraýǵa deıingi ulan-ǵaıyr dalamyzdyń shekarasyn shegendep bekitip berdi. Abylaı babamyz armandaǵan astanany saldy. Alty qurlyqqa uıalmaı kórsete alatyn ǵajaıyp shaharǵa aınaldy. Qantógisterge jol bergizbeı, soǵyssyz otyz jyl basqaryp, elge beıbit zaman ornatty. О́rkenıetti elý eldiń qataryna qosty. Táýelsiz memleketimizdiń irgetasyn kóterip, negizin qalaǵan Elbasy el halqyn ǵana emes, dúnıe júzin tańǵaldyryp, bılikti ótkizip berýdiń ózindik úlgisin júzege asyrdy. Álemdik qoǵamdastyqtaǵy saıası bedeli joǵary, Shyǵys pen Batys elderindegi, Islam álemindegi, Túrki elderindegi, Ortalyq Azııadaǵy, TMD aýmaǵyndaǵy abyroı-ataǵyna eshkim de, eshbir alpaýyt memleketter de kózjumbaılyqpen qaraı almaıtyn, qazaq deıtin halyqtyń álem jurty aldyndaǵy bedeli men abyroıy úshin parasat bıiginen kórine bilgen, ult bolashaǵy úshin úlken erlik, salmaqty sheshim jasaǵan N.Nazarbaevtyń esimi memleketimizdiń tarıhynda sózsiz altyn árippen jazylady. Tuńǵysh Prezıdent – Elbasy, Qaýipsizdik Keńesiniń Tóraǵasy, Nur Otan partııasynyń Tóraǵasy, Konstıtýsııalyq Keńestiń múshesi, halyq qamyn óz múddesi sanaıtyn, basshylardyń jańa býynynyń bılikke kelýin qamtamasyz etýdi óz mindeti dep sanaıtyn Nursultan Ábishuly Nazarbaev, mine, men úshin osyndaı uly tulǵa.
«Qazaqstandyqtar Nursultan Ábishulynyń eńbegine shyn baǵasyn beredi, biraq jaramsaqtardyń maqtaýyn halyq qabyldamaıdy. Ol kisi de qabyldamas deımin. Maqtaý psıhologııalyq sheginen shyqqanda madaqtaǵan tulǵaǵa da jaǵymsyz pikir týdyrady, maqtatyp otyr degendeı oı qaldyrady, aınalyp kelgende bedeline de kóleńke túsiredi. Osydan «tabynýsyz mádenıet bolmaıdy, al mádenıetsiz tabyný – qaýip» degen sóz shyqqan. Qazirgi jastar aqparattyq zamannyń jastary, ózimizdi ózgemen salystyryp baǵalaıdy, arzan sózderge aldanbaıdy. Tarıhı tulǵanyń bedelin baǵalaý men oǵan tabynýdyń arasyn aıyra bilýdiń saıası mádenıeti bizge jetpeı jatyr» dedi birde memleket jáne qoǵam qaıratkeri Amangeldi Aıtaly aǵamyz. Jón-aq. О́z basym jol kórseter aldyńdaǵy úlkendi ákeńdeı syılaý, aǵańdaı qurmetteý, onyń durys baǵytyn qoldap, bastaǵan ıgi isterin aıaqsyz qaldyrmaı, sońyna deıin jetkizý úshin jalǵastyrý – jaǵympazdyq, ne jeke basqa tabynýshylyq emes, ınabattylyq pen ımandylyqqa negizdelgen qazaǵymyzdyń ulttyq qundylyǵy, adamı atrıbýty dep bilemin. Endeshe Elbasynyń elimiz úshin etken eńbegi qurmetteýge turarlyq.
Úmit BITENOVA,
Qazaqstan Jazýshylar odaǵynyń múshesi, Talas aýdandyq
máslıhatynyń depýtaty
Jambyl oblysy