Nur-Sultanda Prezıdenttik jastar kadr rezervi músheleriniń pikirtalas klýby aıasynda otandyq iri bıznestiń negizin qalaýshylarmen kezdesý uıymdastyryldy, dep habarlaıdy, Egemen.kz.
Rezerv músheleri qoǵamdaǵy ózekti máselelerdi talqylaý úshin memlekettik organdardyń, úkimettik emes uıymdardyń ókilderimen turaqty kezdesýler uıymdastyryp keledi.
Ashyq dıalogqa «Bazis-A1 korporasııasy dırektorlar keńesiniń negizin qalaýshy jáne tóraǵasy A.Belovıch, KustoGroup kompanııasy dırektorlar keńesiniń enshiles ıesi jáne tóraǵasy E.Tátishev, Freedom Holding Corp kompanııasynyń bas atqarýshy dırektory, dırektorlar keńesiniń tóraǵasy Tımýr Týrlov spıkerler retinde qatysty.
«Mundaı kezdesýler bizde jıi ótip turady. Biraq negizinen memlekettik organdardyń birinshi basshylary shaqyrylatyn. Bul joly formatyn sál ózgertip, bıznes qaýymdastyq ókilderimen kezdesýdi jón dep taptyq. О́ıtkeni bıznestiń el ekonomıkasyndaǵy róli joǵary. Memleket basshysy bizdi ózgeris agentteri retinde memlekettik qyzmeshilerdiń qataryna qosylýǵa shaqyra otyryp, memlekettik mashınanyń tıimdiligin arttyrýǵa kómektsý kerektigin aıtqan bolatyn. Bul jolda bıznestiń únine de qulaq asý kerek. О́ıtkeni eldegi bıznes prosesterdi ózgertý úshin olardyń paıymyn eskermeı bolmaıdy. Buǵan deıin de aıtqanymdaı, kóbimiz memlekettik qyzmette júrmiz. Biraq tutas jaǵdaıdy túsiný úshin estı bilý kerek. Muny Memleket basshysy «Estıtin memleket» tujyrymdamasyn usynǵan kezde de aıtty. Biz sheshimder qabyldap, bastamalar kótergende óz oıymyzǵa súıenip qoımaı, bıznespen praktıkalyq qajettilikterin de negizge alýǵa tyrysamyz. Búgingi kezdesý osy turǵydan paıdaly boldy dep esepteımin», dedi kadr rezerviniń múshesi, QR Eńbek jáne halyqty áleýmettik qorǵaý mınıstriniń shtattan tys keńesshisi Ádilet Zákıev.
Is-shara aıasynda qazaqstandyq iri bıznes-kompanııalardyń negizin qalaýshylar jumys tájirıbesimen bólistip, bıznesti uıymdastyrýda qoldanylatyn ınnovasııalyq sheshimder týraly aıtyp, bıznes salasyndaǵy qazirgi ahýalǵa baılanysty keńes berdi.
A. Belovıch 30 jyldyq tarıhy bar holdıngti basqarý kezinde jolyqqan qıyndyqtar men erekshelikter týraly, kompanııalardyń sıkldik damýy týraly qyzyqty aqparat berdi. Onyń aıtýynsha, uıymnyń da, eldiń de damýynyń tiregi – myqty kadrlar.
Ashyq dıalogtyń arqasynda pikirtalas klýbynyń qonaqtary rezerv músheleriniń áleýetin baǵalap, jastardyń arasynan áleýetti bıznes-seriktesterdi baıqap, «ózgerister agentteriniń» bıznes-prosesterge, onyń ishinde memlekettik qyzmette de jańashyl tásilderdi engize alatyn býyn ekenine kóz jetkizdi.
Iri holdıng basshylary el damýyna úles qosý úshin Prezıdent jastar kadr rezerviniń múshelerimen tájirıbe almasýǵa daıyn ekenin jetkizdi.
Is-sharany qorytyndylaı kele, taraptar memlekettik jáne kvazımemlekettik organdarǵa qazaqstandyq iri holdıngterdiń oń tájirıbesin paıdalaný úshin usynystar daıyndap, engizýdi josparlap otyr.