«El tiregi – Elbasy» aksııasy aıasynda Qostanaıda «Halyq» qory uıymdastyrǵan qaıyrymdylyq sharada múmkindigi shekteýli balalary bar 200-den astam muqtaj otbasy azyq-túlik sebetterin aldy. Árqaısynyń salmaǵy 50 kılo bolatyn áleýmettik qoraptyń ishinde kúrish, qaraqumyq, un, makaron, suıyq maı, buqtyrylǵan et, qant, shaı jáne kámpıtter bar.
Aýqymdy sharaǵa «Janashyr bol» qoǵamdyq qorynyń volonterleri de atsalysty. Erikti jastar azyq-túlik sebetterin qalanyń ár túkpirinde turyp jatqan turmysy tómen, sondaı-aq kóp bala tárbıelep otyrǵan otbasylardyń úıine jetkizip berdi.
– Úsh kún ishinde 251 otbasyna azyq-túlik sebetterin tarattyq. Muqtaj otbasylardyń úıine jylý syılaıtyn mundaı ıgi sharalar jıi uıymdastyrylyp turý kerek. Ásirese sábılerdiń qýanǵanyn kórgende osynaý sharapatty istiń saýaby mol ekenine kózimiz jete túsedi, – deıdi «Janashyr bol» QQ-nyń volonteri Saltanat Yqylasova.
Uıymdastyrýshylar azyq-túlik sebetteriniń bárin Táýelsizdik merekesine deıin úlestirip bermek. Mundaı is-sharalar Qostanaı qalasyn ǵana emes, oblys aýdandaryna qarasty alys-jaqyn aýyldardy da qamtıtyn bolady.
Qostanaı oblysy